بالصور.. أكثر المواقف المحرجة للشباب مع المجانين.. محمود: «مجنون افتكرني مراته».. نيرة: «ضرب صحبتي قلم بوابين».. نانا: «واحدة عضتني».. راندا:«ضربني على قفايا»..
نقابل العديد من الشخصيات الغريبة يوميا سواء في الشارع أو في المواصلات العامة، بعضهم يدعى الجنون، والآخر مصاب بخلل ما في عقله ولد به أو نتج عن صدمة تعرض لها، لذلك نحاول أن نتحاشى الاحتكاك بهم، إلا أن بعض المواقف تضعك في موضع حرج مع من نطلق عليهم " المجانين".
روى مستخدمو موقع التواصل الاجتماعى "فيس بوك" بعضا من المواقف المحرجة والطريفة التي تعرضوا لها مع من نطلق عليهم المجانين.
"مخه وألف جزمة إنى مراته "
كتب محمود: " المجنون الوحيد اللى كان ليه موقف معايا وقفنى في الشارع ومخه وألف جزمة إنى مراته، وإنى لازم أروح معاه البيت وما أزعلش منه لأنه كان ضربنى آخر مرة، وأنا أعييييط، يا عم أنا راجل زيك يقولى حقك عليا يا حبيبتى يلا نروح البيت أنا وديت العيال عند أمى".
"ضرب صحبتى قلم بوابين"
وعلقت نيرة قائلة: " كان في واحد مريض في عمارتنا في الدور الأرضى، وكان دايما بيقف في الشباك وكل ما أعدى يفضل يشتم فيا بأبشع الألفاظ ودايما أتشتم بماما، المهم لما ماما شخصيا كانت تعدى يقولها إزى حضرتك يا مدام أمانى اتفضلى".
وذكرت كريستين موقف صديقتها قائلة: " كنا في ميكروباص وصاحبتى بتلم الأجرة وأصرت تاخد الأجرة من واد شكله مجنون، عملت عقلها بعقله وهنزلك ويقولها هزعلك، وفضلت مرخمة عليه وقالت للسواق نزله، فجأة راح نازل وهو نازل ضربها قلم بوابين وجرى، صحبتى انهارت عياط والعربية كلها كانت فطسانة ضحك".
"جريت في الشارع بالبيجامة"
ذكرت زينب موقفا حدث لها، قائلة: " مرة ماما وبابا راحو الشغل وأنا كنت في البيت لوحدى يومها مقفلتش الباب بعدهم، وأنا كنت فارشة الكوتشينة في الأرض وجنب التليفزيون، لقيت ولد دخل الأوضة آه والله انا اتصدمت خليته بس يدخل الأوضة وطلعت أجرى عالشارع بالبيجاما وأما الجيران دخلوا لقيته بيلعب بالكوتشينة ومن يومها وأنا بقفل الباب كويس حتى لو كلنا موجودين".
"يطفى السيجارة في قفايا"
علقت لولا: " كنت ماشية أنا وأختى وفجأة معرفش طلعلى الأهبل ده إزاى وإلا يطفى السيجارة في قفايا وأنا أجرى، وأختى تجرى، وهو بيجرى ورانا والحمد لله حاشوه عنى".
أما إيمى فكتبت: " واحد وقفنى قدام محل فجأة كده وقف قدامى وقالى لو سمحتى فوقفت، قاللى لو حد سأل عليا قوليله إنى جوه ودخل".
"أسرع من ميسى"
وكتبت سمر " مرة واحد مش طبيعى كنت راجعة من المدرسة وواقفة مستنية صحبتى ولقيته جاى جنبى وعايز يبوسنى، واكتشفت إنى بجرى أسرع من ميسى بالرغم من إنى كلبوظة".
أضافت جهاد: " فيه واحد مجنون مشهور إنه بيشتم أي حد يقابله بأقذر الألفاظ، كنت في شارع رئيسى مشهور بيكون مليان ناس وأنا ليا "برستيجى "، ركبت العربية ولسه بفتح الشباك عشان أمشى لقته واقفلى في الشباك قلت خلاص هتبهدل، واستعديت للى هسمعه لقيته بيقولى اتفضلى يا ست الكل عدى ونظملى المرور".
"عايز يأكلنى في بقى"
وتذكرت هدير: " مرة كنت ماشية مع صحابى وجه واحد مجنون بياكل سندويتش أنا معرفش أنه مجنون، قولت شحات الراجل راح باصصلى وطلع يجرى عليا وصحابى الجزم سابونى وأنا من الصدمة أرجع لورا لحد ما لزقت في الحيطة والراجل مصر يأكلنى في بقى وأنا أزقه وهو مصر والناس تضحك، بس فلت منه الحمد لله زقيته وجريت".
"ضربنى على قفايا"
وأضافت نانا " مرة وأنا صغيرة كنت مع ماما، بس ماما مشيت من تحت الكوبرى، وأنا مشيت من فوقه وقامت واحدة ماسكانى وعضانى وتقولى ابعدى عن النخلة بتاعتى".
فيما قالت راندا " مرة واحد مجنون خلانى طالعة من الدرس وراح ضربنى على قفايا وطلع يجرى".
وكتبت فيروز: " مرة كنت في شارع وكان فيه شحات أخرس وقعد ماشى ورايا ويقولى هابا هبا هابا، وبعدين قولتله الله يسهلك فضل نفس الكلام " هابا هابا"، وبعدين قولت لصحبتى شكله عبيط راح رادد عليا طب ليه الغلط طيب؟ اترعبت ومشيت".
