أحمد الغرباوي يكتب: طَمّني عَلِيكْ
والله.. والله بَسّ
عاوز.. عاوز أطمّن عَليكْ؟
والحلم اللي عِشْتُه إمبّارح
كُلّه كان حواليك..
حُزْن بيوجعني مِنّكْ
خُوف باعدني..
غصب عَنّي؛ بيشدّني ليك
مِشْ عاوز أشوفه فيكْ..!
،،،،
والله.. والله بَسّ
عاوز.. عاوز أطمّن عَليكْ؟
كلمة واحدة نفسي أسمعها
( الحمد لله )..
ومعاها مابحلمش بأكتر من
و(ربّنا يخلّيك)..؟
وأيّ لحظة ألم
ربّي يسيبها ليّا
وفرحة العُمْر كُلّه لِيكْ..!
في يوم
حُبّ كبير يلاقيك
يخبّط على باب قلبك
لاتِصدّقه رُوحك
وناكره شوفك
تجرحه بلومك
تغرّقه دموعك لو
لو ما لمستهوش بعينيكْ..!
هوّه دا بجدّ يا (حبيبي)
هوّه دا بِجَدّ
القلب اللي بيحِسّ بيكْ..!
القلب اللي دايْمًا شايْلك
وهوّه عامل ناسيكْ..!
حتى وإنْتّ بتبعد عَنّه
يِتْمَنّى مِنْ رَبّه يموت
يموت فِيكْ..!
ولابين شفايْفه عايْزه
عايز غُناه حَيْاة
حَيْاة تِجافِيكْ..!
والله.. والله بَسّ
عاوز.. عاوز أطمّن عليكْ؟
ولا أكتر من (الحَمْدُ لله)
ولاحلمت بأكتر من
من ( ربّنا يخلّيكْ )..؟
