كابتن ماجد: موعدنا يوم السبت

جدول الدوري يؤكد أن نتيجة مباراة الأهلي والزمالك القادمة مش هي اللي هتحسم الدوري.. لكن أنا بقولك إن مباراة الأهلي والزمالك السبت القادم هي مباراة الحسم ولو معنويا على الأقل.. بمعنى أنها ممكن تعمل حاجة من اتنين.. الحاجة الأولى هي أن الزمالك يفوز وبالتالى تزداد ثقته بنفسه ويكمل مشواره على قمة الجدول وهياخد الدوري لا محالة.. خاصة أنه يمتلك مجموعة من اللاعبين ممكن يحققوا ده بكل سهولة.. لكنه مش هياخد الدوري في العام القادم بالتأكيد.

أما الحاجة الثانية فهى فوز الأهلي وساعتها الزمالك هيموت إكلينيكيا لمدة لا تقل عن 11 سنة قادمة مش هيشم خلالها ريحة دوري ولا كأس حتى لو اشترى رونالدو وميسي ومحمد صلاح.

حد منكم هيقولى أنت متحيز للأهلي يا أبو الكباتن.. وأنا هقولك لا أبدا خالص.. لأن التاريخ بيقول كده.. والدليل هو شعار "سنظل أوفياء" الذي يرفعه الزملكاوية عبر الزمن.

الفرق بين الأهلي والزمالك أن الأهلي ممكن يتهزم في الملعب.. لكن الزمالك ممكن يتهزم في أي حتة.. الزمالك بيتهزم نفسيا وبينقسم على نفسه بسرعة البرق.. بعكس الأهلي اللي الهزيمة بتخليه يصلب طوله علشان يرجع من جديد.

على فكرة الكلام ده نتيجة أبحاث عبر التاريخ وليس كلاما عشوائيا، ومالوش علاقة خالص بكونى زملكاوى أو أهلاوى.. وأخيرا.. موعدنا يوم السبت.