ممدوح السباعي يكتب: أنا وهو

أنا: بسم الله الرحمن الرحيم

سلام قولًا من رب رحيم
إنت مين يا عم إنت ؟
هو: أنا جدك إله البحار يا واطي
أنا: طب وليه الغلط دا يا عم الحاج ؟
أنا جدودي ناس مؤدبين ومش بتوع غلط
هو: أيوه واطي وفلاتي وبايظ كمان
أنا: يا عم بس ما تقولش بايظ أنا راجل مدرس محترم
هو: يا فرحتي بيك يا مدرس يا محترم
ما هو لما احنا نتعب ونشقي ونسيب لكم ثروة وأملاك
وحدود بحرية وحدود برية وإنت تفرط فيها بكل سهولة تبقي بايظ
أنا: عرفتك بتتكلم عن إيه، تيران وصنافير صح ؟
هو: أيوه يا خيبة أملي
أنا: طيب وإنت بتقولي أنا الكلام دا ليه ؟
هو حد قالك عليا وزير الموارد المائية
هو: ما أنا ما لقيتش غيرك نايم علشان أنا باطلع في الحلم بس
أنا: أنا صليت العشا ونمت شوية قبل السحور
هو: طيب يا أخويه وليك نفس تتسحر وتاكل ؟
أنا: طيب يا جدي قلي أعمل إيه طيب وأنا أعمل
هو: يا د تيران وصنافير مصرية
دا احنا ياما صدنا منهم سمك زمان يا ولدي حرام عليكم
أنا: تيران وصنافير مصرية ـ تيران وصنافير مصرية
ارتحت يا جدي يالا سيبني أنام
هو: والله ما فيكم فايدة ياولاد الكلب
ياد إنت هتاخدني على قد عقلي ؟
ياد قوم اعملك مظاهرة ولا وقفة احتجاجية إنت والشباب اللي زيك
أنا: يا سلام يا اخويه ولما اتمسك وأترمي ف الحجز واشبع ضرب
هتنفعني إنت ؟
والنبي اسكت يا جدي إنت ما تعرفش حاجة
وبعدين فين ورق الملكية بتاع الجزر دي ؟
هو: أبوك فين ياد ؟
الورق كان معاه هو
أنا: أبويه نايم بردوا
هو: خليكم نايمين يا خسارة تعبنا وشقانا عليكم
والرئيس إيه رأيه في الموضوع ده ؟
أنا: عليا النعمة إنت جاي وناوي تحبسني يا جد
يا بوي اسكت الدولة كلها بتقول تيران وصنافير سعودية
الرئيس والوزرا والنواب والإعلام إنت ما سمعتش مصطفى بكري
عايزني أنا أعمل دكر وأقول مصرية وساعتها إنت أول واحد
هتتخلي عني
هو: مين مصطفى بكري ده ؟
أنا: دا واحد بياع لبن
هو: ما فيش فايدة عليكم اللعنة خلايف تجيب العار
حسبي الله ونعم الوكيل فيكم