الثلاثاء 26 يناير 2021...13 جمادى الثانية 1442 الجريدة الورقية

أشياء مهمة عليك معرفتها قبل الوقوع في الحب

مقالات مختارة 850

خلونا نتكلم بصراحة، وأقول في البداية إني دايمًا بشوف نفسي، أو كنت بشوف نفسي لحد فترة قريبة -حرفيًا - منفعش أتحب ومكنش عندي ثقة في نفسي تمامًا في موضوع إني ممكن أتحب أو أدخل في علاقة زي أي شاب في سني!اضافة اعلان


والفكرة دي مكانتش جاية من فراغ!، ده أنا كنت كسرت الرقم القياسي في جملة خلينا أخوات أو زي ما بيسموها بـ"الفريند زوون" وطبعًا الموضوع كمان كان بيقلب في بعض الأوقات لـ"Son Zone" آه والله!، كان بيتقالي حساك زي ابني وساعات كمان كان بيتقالي حساك زي بابا أو إنك أبويا التاني، يعني مكفاش زي أخويا وزي ابني لا كمان زي بابا!

غير طبعًا كنت بسمع إني مينفعش أتحب علشان جسمي كان تخين أو مازلت منفعش أتحب علشان "أعرج" زي ما اتقالي من فترة من بنت كانت صديقتى من الطفولة، ولحد فترة قريبة، علشان قالتلي مينفعش أرتبط بيك "أنت أعرج" ومن الحاجات المهمة بالنسبة لي شكل شريك حياتي!

ومن فترة كنت بتكلم في الموضوع ده مع عمرو المراكشي صديقي في موضوع أن ساعات الإنسان بيفقد الثقة في نفسه في موضوع إنه حلو أو مقبول لدى الجنس الآخر، وحكالي قصة حد كان مبسوط ماديًا وحلو شكلًا وكل حاجة بس مكانش عنده القدرة أنه يصارح البنت اللي بيحبها أنه بيحبها لحد ما اتخطبت لواحد تاني أقل ماديًا وجماليًا وكل حاجة!، وساعتها حد من صحابه قاله أنا لما عرفت إنك بتفكر فيها بطلت أفكر فيها علشان تعرف تقولها، وفي الآخر مروحتش!

قيس على كده حاجات كتير، ناس كتير بتبقى جواها إمكانيات حلوة ومميزات فعلًا رائعة جدًا بس برضو يفضل محلك سر ومياخدش أي خطوة في حياته، أنا بعترف إني كنت في يوم من الأيام من الناس اللي شايفين أنهم غير مميزين ومينفعش يتحبوا، بس مع الوقت أدركت حقيقة يمكن كتير منا مش ببيشوفها وهي أنك ممكن تكون مناسب بس منفعتش علشان أنت مع الشخص الغلط.

أعرف نفسك الأول وقدراتك ومميزاتك وساعتها هتقدر تعيش حياتك زي ما إنت تحب أو تتمنى، وصدقني مفيش حد ربنا خلقه غير وهو في مميزات كتير بس هو مش واخد باله!

ولازم كمان تعرف أنك لو بتدور على الكمال فعمرك ما هتعرف تحب، فالحب يعني عشق العيوب قبل المميزات.
Twitter.com/PaulaWagih