عمري ما شربت مخدرات ولا سجاير، مفاجأة في اعترافات طليق هدير عبد الرازق

الإثنين 13/أكتوبر/2025 - 04:15 ص

18 حجم الخط

ترصد فيتو نص أقوال طليق هدير عبد الرازق الشهير بـ أوتاكا الذي أدلى بها أمام جهات التحقيق المختصة التي باشرت معه التحقيق، في القضية التي حملت رقم 1927 لسنة 2025.

س_ ما قولك فيما قيل من قبل قوات الأمن بمحضر ضبطك من أنهم حال توجههم لضبطك لتنفيذ إذن النيابة العامة، وبتفتيشك عثروا على 2 هاتف محمول ماركة آيفون، وأربعة قطع بنية اللون كبيرة الحجم يشتبه أن تكون لجوهر الحشيش المخدر، وثلاث زجاجات بداخلها مادة بيضاء تشتبه أن تكون لجوهر الكوكايين المخدر، ومبلغ مالي وقدره 3 آلاف جنيه، وكاميرا ولاب توب.

ج_ هما ملقوش حتى علبة سجائر وخدوني وقفلوا الشقة ونزلوا على العربية فتشوها، وخدوا منها البطاقة الضريبية والرخصة وركبوني البوكس، وطلعوا بيا على قسم الشروق، مفتش التهرب الضريبي هناك سلم عليا وقولتله إني عملت البطاقة الضريبية والسجل التجاري زي ما قالي، فقالي إن فيه فرق ما بين الضرايب واللي أنا بكسبه، فرديت وقلتله إن فيه 5 آلاف دولار من 15 ألف دولار اللي لقيوهم في المحفظة دول مش بتوعى، دول حد كان محولهوملي بيسحب من حسابي، وأنا كنت ببعتهمله على محفظة كاش أو إنستا باي.

وأوضح البلوجر أوتاكا في اعترافاته: بتاع التهرب الضريبي قالي أجيله على التهرب الضريبي لما أخرج من المشكلة اللي أنا فيها، وأبعت الإقرارات الجديدة ونحسب ونشوف، بعد كدة مباحث الإنترنت فحصوا تليفوني مدة طويلة بعد ما كان الضابط اللى مسكنى فحصه هو كمان، وقعدوا يتكلموا معايا ويسألوني وبعد كدة قالولى إن تليفونى مش عليه حاجة، وجابولي ماية وعاملوني كويس، وقالولى أتصور مع المخدرات، فأنا قعدت أعيط وأترجاهم متصورش مع الحاجة وفي الآخر مصورونيش فعلا، وبعدين نزلوني الحجز واتعرضت النهاردة علي النيابة.

س_ ماذا عن اعترافك في محضر الضبط أن حيازتك للمادة المخدر بقصد الاتجار وأن المبلغ المالي المضبوط داخل الحسابات البنكية الخاصة بك والسيارة المضبوطة من متحصلات هذا النشاط؟

ج: لا دا محصلش، والتهرب الضريبي لما كلمني كان بيكلمني في 100 ألف جنيه زيادة، وضابط الانترنت كان قايلي إنهم ضبطوني عشان كدا بس ملقوش حاجة على التلفون.

س: إذا وما هي صلتك وعلاقتك بالمضبوطات السابق عرضها عليك في مواجهتك بصدر التحقيقات تحديدًا؟

ج: التليفونين واللابتوب والكاميرا بتوعي، والفلوس والمخدرات دول معرفهمش.

س: وملك من السيارة ( ك ب 9732 )؟
ج: دي بتاعتي.

س: وهل معك ما يثبت ذلك؟
ج: الرخصة في العربية.

س: ومن أين تحصل الضابط سالف الذكر على باقي تلك المضبوطات؟

ج: معرفش وفيه كاميرات في القسم ممكن تثبت عشان الحاجات دى مكنتش معايا.

س: وبم تعلل عرض ما تبقى من تلك المضبوطات رفقتك علينا؟

ج: مش عارف.

س: وإلي أي مدي تتعاطي ثمة مواد مخدرة؟

ج: أنا عمري ما شربت مخدرات ولا حتى سجائر، وعندى فيديو منشور جايب 11 مليون مشاهدة، بتكلم فيه عن أضرار المخدرات، الحاجة الوحيدة اللي باخدها هي ستيرويدز الجيم.

س: وما هي الحالة الاجتماعية لأسرتك وأعدادها؟

ج: أنا اتولدت في أسرة متوسطة اجتماعيا، مكونة من أب وأم وأخ وأخت شقايق أكبر مني، وأختين وأخين أصغر مني، واتولدت في المرج وزي ما قولت لحضرتك أبويا كان عنده مصنع ملابس وأمي ربة منزل من وأنا صغير.

س_ ماذا عن اتهامك بحيازة سيارة بها مواد مخدرة (كوكايين) بقصد الإتجار في غير الأحوال المصرح بها قانونًا علي النحو المبين بالتحقيقات

ج_ محصلش.

س: ما قولك فيما هو منسوب إليك من أنك متهم بحيازة مواد مخدرة (حشيش) بقصد الإتجار في غير الأحوال المصرح بها قانونًا علي النحو المبين بالتحقيقات؟

ج: محصلش.

س_كيف تم القبض عليك؟

ج_أنا كنت في الجيم ورجعت على البيت لقيتهم خبطوا عليا، والامن دخل عليا البيت بحجة إن فيه مشكلة بالصيانة، لقيت الحكومة وراهم ومعاهم كلابشات وقالولي تعالى معانا من غير شوشرة، وأنا سلمت على طول، وكان مدير أمن الكمبوند واقف، وهما دخلوا فتشوا الشقة لقوا 500 جنيه والضابط اداهالي، ولقوا التليفونين بتوعى واللابتوب والكاميرا، وطلبوا مني الشواحن بتاعة التليفونات اللابتوب فجبتهالهم وسألني لو بشرب مخدرات فقولتلهم لا.

وكانت قد حددت المحكمة المختصة جلسة 15 أكتوبر، لنظر أولى جلسات محاكمة التيك توكر أوتاكا، طليق البلوجر هدير عبد الرازق، بتهمة غسل أموال حصيلة تجارة المخدرات قيمتها 12 مليون جنيه، ونشر فيديوهات خادشة للحياء.