إسماعيل ياسين في قناة الجزيرة: "شى لله يا سيدى أبو حصيرة"

آه يا شلاضيمى يانى يا مااااااااااما.. هو فين الإعلام الحُر اللى قناة الجزيرة بتقول عليه.. دى إسرائيل مولعه نار والجزيرة لا حس ولا خبر.. يا خى جاتها ستين ألف نيلة اللى عايزة خلف يشبه مذيعى الجزيرة ومعدى برامج الجزيرة والكل كليلة.. إنها هزلت وذبلت وتنيلت بستين ألف نيلة.. زغردى يا سميرة.. دى إسرائيل مأنتمة مع الجزيرة.. شى لله يا سيدى أبو حصيرة

إسرائيل بتتحرق بقا لها كام يوم.. مظاهرات وتكسير ورصاص شغال على ودنه.. والجزيرة عاملة ودن من طين والتانية من عجين.. إلهى تنخرصوا كمان وكمان يا هباب البرك..

يعنى ما شفناش الجزيرة عاملة "مباشر إسرائيل" زى ما عملت مباشر مصر ومباشر تونس ومباشر سوريا ومباشر ليبيا ومباشر اليمن.. ولا يعنى اللى في إسرائيل ده لا يستحق المباشر؟!.. إننى أشعر بالانعيياى.. آه يانى يا عيان يانى يا مااااما

يهود إثيوبيا "الفلاشا" بيتعاركوا مع اليهود الروس والأوروبيين في قلب إسرائيل، والجزيرة عاملة نفسها نايمة.. أين أنت يا حقوق الإنسان.. الجزيرة تصنع الحدث في كل مكان وتنفخ في النار في كل بقعة.. إلا في إسرائيل تلاقيها مطنشة وعاملة من بنها

قناة الجزيرة اللى وصل بها الحال إنها تناقش مشكلة ارتفاع سعر الليمون في مصر، وراحت المذيعة اللولبية تشد في فروة رأسها وتحذر من انهيار الاقتصاد المصرى في حال عدم التصدى لارتفاع سعر الليمون المفاجئ لم تنطق بربع كلمة عن مظاهرات إسرائيل..

الجزيرة التي تتشدق بحقوق الإنسان لم تتوقف لحظة أمام مقتل شاب إثيوبى من يهود الفلاشا برصاص ضابط إسرائيلى بسبب العنصرية.. وأنا مش عارف يا خويا هي الجزيرة بتخاف على زعل إسرائيل قوى كده ليه.. يكونش بيخافوا على زعل الأمير تميم والأميرة موزة؟! يبدو أنه كذلك.. فالأهل والأصدقاء لازم يراعوا مشاعر بعض، ولو فيه مشكلة تتحل بهدوء ولا داعى للتهييج

ويبدو أن "مارك" بتاع فيس بوك ليس وحده من حجب عنا أحداث إسرائيل لأنه يهودى الهوا.. وآه يا هوا يا هوا.. ويلا بقا.. سلامو عليكووووووووووو.