كابتن ماجد.. إدى ضهرك للملعب
مش لازم تشجع الزمالك وأنت أهلاوى لمجرد أنه بيلاعب فرقة مش مصرية.. وبرضو مش لازم تشجع الأهلي وأنت زملكاوى حتى لو كان بيلعب ضد فريق من بلاد الواق واق.. كل واحد بيشجع فرقته ومش بيحب أن المنافس التقليدى بتاعه يفوز على أي حد بتاتا البتة.
يعنى أنا كأهلاوي لو حضرت تمرينة للزمالك فيها تقسيمة بين مجموعتين هتلاقينى مش عايز ولا مجموعة منهم تفوز على التانية.. وأظن الناس الطبيعيين في مختلف أنحاء العالم زى حالاتى كده.. سايبين نفسهم بدون تعقيدات ولا تكليفات من عينة أنا هشجع الفرقة اللى بتنافسني لمجرد إنها بتلاعب فرقة أخرى مش مصرية.
دى حاجات عفا عليها الزمن كان قد ابتلانا بها بعض الإعلاميين والصحفيين ومعلقي المباريات القدامى خلال الأعوام الطويلة الماضية.. حتى تمكنت منا وأصبحنا نشعر بالعيب والخيانة إذا ما أعلنا أننا نشجع فريقا أفريقيا أو عربيا أثناء لعبه ضد منافسنا المصرى التقليدي.
أرى أن هذه الحالة مصرية بامتياز لدرجة أنهم ربطوها بالوطنية.. وانا مش عارف إيه الوطنية في إنى أشجع فرقة مش بحبها غصبا عنى.. إنها مجرد كذبة تربينا عليها.. زيها زى حاجات كتيرة اكتشفنا إنها ملهاش أي ستين لازمة.
فيا كل زملكاوى يشجع الأهلي عندما يلعب ضد فرقة أجنبية.. ويا كل أهلاوى يشجع الزمالك لنفس السبب.. اسمحلي أقولك: انت مُشجع كذااااااب
