على غزلان: دخلت عالم استاند آب كوميدي بالصدفة.. أبويا قالي «فكك من الطب» بعد نجاح البرنامج.. ناوي افتح عيادة واخصص يوم في الأسبوع بالمجان.. الثانوية العامة مش بعبع.. وكل كلية ليها مميزات وعي

اختاره موقع التواصل الاجتماعى «فيس بوك»، ليكون ضمن أفضل 60 شخصية مصرية مؤثرة على رواد الموقع، وذلك بعدما حازت فيديوهاته الساخرة إعجاب ومتابعة الآلاف من الشباب.

"على غزلان" ستاند أب كوميديان هو ابن محافظة كفر الشيخ، وطالب بكلية الطب، يعتقد أن الكوميديا تتقاطع مع رسالة الطب، فكلاهما يشفي إلا أن واحدة تعني بالروح والثانية بالأجساد، ويدرك أهمية الابتسامة في وجه المريض ليسترد عافيته.

دراسة الطب
التقت "فيتو" "غزلان" الذي أشار إلى أهمية إدارة الوقت، حتى يتمكن من التوفيق بين دراسته للطب وممارسة الهواية التي يحبها، وهى الاستاند أب كوميدي، مؤكدا أن المسرح ومواجهة الجمهور نمى لديه القدرة على التعامل مع الناس.

وأكد أنه دخل مجال الأستاند أب بالصدفة البحتة، وقال: "طلب مني واحد صاحبي اسمه حسام أعمل استاند أب كوميدى، مكنتش عارف أزاى، دخلت على جوجل أتفرجت على فيديوهات، شوفتهم بيعملوا ازاى وجربت ونفعت".

فكك من الطب
وأضاف مازحا :"في البداية أهلي مكنوش موافقين وقالولى ركز في دراستك، ولما أبتديت أخد فلوس قالولي خصص جزء للاستاند أب كوميدي، بعد كده لما بقى يطلعلي فلوس كتير منها أكتر من الطب قالي والدي اهتم بيه أكتر وفكك من الطب.. لكن أنا في النهاية قررت أن الطب ده هو مجالي الحقيقي لكن الاستاند أب واخدها هواية بس".

وأوضح أنه دخل مجال السوشيال ميديا منذ عام ٢٠١١، من خلال نشر فيديو، عن موقف تعرض له بالصدفة متمثل في انتظار صديق له تأخر عن موعده معه، وحصل الفيديو على مائة ألف مشاهدة".

وعن المشكلات التي واجهته، قال :"أول مشكلة إن كل الناس كانت بتقولي ركز في الطب، والتانية أني مطالب دايما أكون بضحك وبشوش مع كل الناس، والحاجة الأخيرة انى محصور في الكوميديا، ومش كل الناس بتتفرج على الكوميدي بس ومش كل الناس بيعجبها الإفيه بالتالي بتعرض لشتايم على طول"، وأضاف: "أول مرة تعرضت بها إلى السب أغلقت حسابي الشخصي على الفيس لمدة شهرين.. لكن دلوقتى اللى بيشتمنى بعمله بلوك".

وعن تجربة التمثيل، قال على :"عملت فيلم اسمه "حكايتنا" مع لطفي لبيب، وحصل على المركز الأول في مهرجان الإسكندرية السينمائى، ومثلت حاجات مسرح، بس أنا بفضل فيديوهات السوشيال ميديا لأنها في يوم واحد بتتصور وتتمنتج".

التمثيل
وتابع:"حابب أكمل في التمثيل لكن لما يتعرض عليا حاجة حلوة، مع ممثل كبير.. مش حابب أعمل أدوار صغيرة حتى لو فيها فلوس كويسة، بحس أن المنتج جايبنى في دور حشو عشان يستغلني تجاريا بسبب عدد المتابعين ليا".

وقدم نصيحة للطلاب قائلا:"أوعي تحط في دماغك بعبع الثانوية العامة، هي سنة وهتعدي، وأي كلية هتدخلها هي اللى ربنا كاتبهالك، في ناس في طب وفاشلين، وفي ناس في معهد خدمة اجتماعية وناجحين، كل كلية لها مميزاتها..أنا لميت منهج الثانوية العامة في شهرين بالضبط..حاول واتعب وربنا هايديك".

وعن خططه المستقبلية قال:"ناوي أفتح عيادة واخصص يوم في الأسبوع بالمجان وطول الأسبوع هكشف على غير القادرين بالمجان.. عشان أفيد الناس بالعلم اللى ربنا مديهوني"، أما عن مجال التمثيل فقال:"نفسي أكمل وأبقى حد تقيل في المجال ويكون ليا فيلم بطولة".