«جريمة في الحي الهادئ».. «سهرة حلوة» تكتب نهاية «عجوز الهرم».. صاحب كشك: «كان بييجي المخزن مع شاب صغير».. حارس عقار: «كل فترة بشوفه مع واحد شكل».. وأح
في شارع مظلم بـ«المنطقة ص» بحي حدائق الأهرام، يقبع العقار رقم 87 شاهدا على جريمة قتل مروعة أثارت غضب ساكني الحي الهادئ، بعد أن فوجئ قاطنوه- مساء الإثنين الماضي- برجال المباحث يملأون جنبات شارعهم، على وقع خبر العثور على جثة لرجل مسن في شقة بأحد العقارات.
«فيتو» انتقلت لمكان الجريمة؛ لتُنقب عن تفاصيل الحادث من أهل المنطقة، والتقت بعضا من الشهود؛ ليروون تفاصيل اليوم المشئوم.
«أبو روماني» حارس العقار المقابل للعقار مسرح الجريمة، كان أول من اكتشف الواقعة، وقال في حديثه لـ"فيتو": «أنا كنت قاعد قدام عمارتنا وجالي ناس بتسأل لو شفت راجل عجوز بأوصاف معينة بييجي شارعنا، قولتلهم إن فيه راجل عجوز اسمه عم جمال بييجي العمارة اللي قصادنا من وقت للتاني، وبيشتري من الكشك بتاعي اللي بسترزق منه جنب حراستي للعمارة سجاير أو عصاير، كنت أغلب الوقت بشوفه معاه شاب صغير، وكانوا بيدخلوا المخزن اللي في العمارة».
يتابع حارس العقار السبعيني: «يوم الاتنين في حدود الساعة 10 بالليل، لقينا المباحث مالية شارعنا، وقبل ما نفهم أي حاجة دخلوا المخزن اللي في عمارة 87، ولقيناهم طالعين بجثة عم جمال ودماغه مفتوحة، وبيقولوا إنه مات من كام يوم، الله يرحمه».
على بعد خطوات من «أبو روماني»، يجلس محمد، حارس أحد عقارات الشارع، تحفظ في البداية على الحديث عن الواقعة مرددا: «إحنا ناس غلابة وفي حالنا ومنعرفش حاجة»، وبعد محاولات مُضنِية، قال في عُجالة: «أنا كل اللي شوفته يوميها البوليس جيه وفتح المخزن، وكنا واقفين معاهم أنا وكام بواب، لقينا الراجل سايح في دمه على الأرض والمخزن متبعتر، الراجل ده لا مؤاخذة كان بييجي هنا كل فترة ومعاه شاب شكل، معرفش بقى مين اللي قتله ولا إزاي، بس هو عمره ما جه المخزن ده لوحده».
«المنظر كان بشع وشكل الجثة وريحتها مش غايبين عن خيالي».. جملة قالها "ياسر. ن"، أحد سكان العقار 87 الذي شهد الجريمة، مضيفا: «أنا لقيت صوت عالي ودوشة تحت العمارة، واحنا شارعنا هادي، ونادرا ما تسمع فيه صوت، نزلت أشوف فيه إيه، لقيت المباحث مالية المكان وبيقولوا فيه جريمة قتل».
وبعد سكون للحظات استرجع خلالها المشهد، أشار ياسر إلى أن رجال المباحث اقتحموا المخزن، ورأى بعينيه جثة رجل في السبعينيات من عمره، مقتولا بضربة آلة حادة على رأسه من الخلف، وواضح من رائحتها أن الواقعة منذ أيام، وأردف: «سمعت من بوابين المنطقة أن ده مخزن بتاع ابن الراجل المقتول، وأنه كان بييجي هنا من وقت للتاني، بس احنا بطبيعة منطقتنا صعب تلاقي حد ياخد باله بسهولة لو حصل أي جريمة للأسف، ربنا يستر علينا».
ولم يكد يمض أقل من أسبوع، حتى كشفت مباحث الجيزة غموض الواقعة، وألقت القبض على 3 عاطلين؛ لاتهامهم بقتل «عم جمال»، وكشفت التحريات أن المتهمين ارتكبوا الجريمة لسرقة الضحية، وتم إحالتهم إلى النيابة للتحقيق.
بدأت الواقعة بتلقى قسم شرطة الهرم، بلاغا يفيد العثور على جثة أحد الأشخاص، جمال 71 سنة، داخل مسكنه بالهرم، فانتقل رجال المباحث إلى محل الواقعة، وكشفت التحريات أن 3 عاطلين وراء قتل المجنى عليه، بالاعتداء عليه بآلة حادة على رأسه.
التحريات كشفت أن أحد المتهمين تربطه علاقة صداقة آثمة بالمجني عليه، وأنه استعان بالمتهمين الآخرين لسرقة القتيل، حيث استولوا على مبلغ مالي وهاتف محمول وسيارة ملك الضحية.
وبإعداد كمين للمتهمين تمكن رجال المباحث من ضبطهم، وتحرر محضر بالواقعة، وأخطر اللواء عصام سعد مدير أمن الجيزة، واللواء إبراهيم الديب مدير الإدارة العامة للمباحث، وتولت النيابة التحقيق.
