البااارلمنجى: نواب دايرتنا محتارين.. تيران وصنافير هيروحوا لمين؟
بصراحة أنا مش عارف أبدأ معاكم منين.. من حالة الطناش اللى عايشها كل نائب في دايرتنا تجاه مشاكلنا.. ولا من موقفهم المتناقض من تيران وصنافير!!
طب سيبك أنت وهو من الطناش بتاع النواب علشان إحنا اتعودنا عليه تقريبا.. خلينا بقى في موقفهم من الجزيرتين.
وأنا جمعتكم النهاردة يا أهالي دايرتنا الكرام علشان أقول لكم إن نواب الدائرة الأربعة أعلنوا لنا أنهم مع مصرية الجزيرتين عدا واحدا منهم قال إن الجزر سعودية، لكن حين استضافتهم وسائل الإعلام لم يجزم إلا واحد منهم بمصرية الجزيرتين، والباقى سايبينها عايمة تقبل التأويل، وينتظرون قرار زملائهم بالبااارلمان.
أنا اللى تاعبنى هنا هو ليس إلى من ستأول الجزيرتين.. فرئيسنا وقواتنا المسلحة أحرص منا على الحفاظ على الأرض المصرية هذا إذا كانت بالفعل مصرية من وجهة نظرهم.. لكن أنا اللى تاعبنى هو موقف نوابنا المتناقض تجاه تلك المسألة.
نوابنا لهم آراء متضاربة.. ساعة تروح وساعة تيجى.. هي بصراحة مش آراء ولا يحزنون.. لأنهم أصلا ماكانوش يسمعوا عن تيران وصنافير قبل كده.. لكنها محاولة منهم لإرضاء جميع الأطراف في قضية يجهلونها تماما، وأنا أعلم ذلك علم اليقين.. إلا أنهم لا يعترفون بأنهم مابيعرفوش.
مشكلة نوابنا أنهم يركبون الموجة -أي موجة- إنها ليس لها علاقة بحياة أبناء الدائرة اليومية ومعاناتهم.. يعنى أهى حاجة بيضيعوا فيها مدة تواجدهم في البرلمان بجوار تنفيذ طموحاتهم الشخصية والعائلية.. مثلما يضيعون أوقاتنا وأوقاتهم في حاجات كتير من عينة «كشف العذرية وتحديد مدة الخطوبة وإخصاء المتحرش».
ياحبايبى يا سيادة نواب دايرتنا.. أنا عارف أنكم محتارين.. ومش عارفين تيران وصنافير هيروحوا لمين.. بس كل الحكاية إنكم عايزين ترضوا المسئولين.. أما نحن أبناء دائرتكم فبعيد عن القلب وبعيد عن العين.
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.
