نشطاء ينصحون ربة منزل لتدبير احتياجات أسرتها بـ 1000 جنيه في الشهر

حاول نشطاء صفحة "تجربة" بموقع التواصل الاجتماعي "فيس بوك" تقديم النصيحة لإحدى متابعيهم عن كيفية تدبير احتياجات أسرتها بمبلغ 1000 جنيه شهريًا، مؤكدة أن المبلغ المقرر للطعام والشراب لثلاثة أفراد شهريًا.

البداية كانت من ضحى غازي، التي طلبت من متابعي الصفحة "عايز تنزلي بوست ازاي امشي بيت مكون من 3 أفراد بـ 1000 جنيه شهريًا بدون أي إيجار أو فواتير ده مبلغ للبيت فقط".

وتوالت النصائح عليها بعد ذلك من متابعي تجربة، فنصحتها إيمان خالد:"حضرتك انتي تروحي الجمعيات الاستهلاكية تجبيلك فرختين و2 كيلو لحمة وكبد وقوانص و2 كيلو سجق شرقي مثلًا و2 كيلو عدس و4 كيلو أرز وطبق بيض و4 علب جبن وخضراوات دول هيدخلوا في 400 أو 450 جنيهًا بالكتير وبالباقي خليه معاكي جيبي الخضراوات أسبوعيًا ويفضل من الأسواق الأسبوعية اللي بينزلوا الأسعار هتمشي الحال إن شاء الله".

وعلق أحمد لطفي هلال:"500 جنيه 10 فرخات بأوزان من 1.6 لـ 1.8 كيلو، و100 جنيه لـ 150 جنيها خضراوات وخلافه، و4 علب جبنه سعر الوحدة 11 جنيه كدا 44، وعلبة حلاوة، وعلبة مربى، وعلبة عسل أسمر، يعملوا في حدود 100 جنيه لو الأحجام كبيرة يعني، ودا حسب الرغبة مش هحسبهم من ضمن الحساب، و4 كراتين بيض سعر الكرتونه 32 جنيها يعني حدود 128 جنيها، كدا الحساب هيكون تقريبًا في حدود 800 جنيه جبنا بيهم طلبات غدى وعشى أساسيين".

وأضاف:" وبالباقي بئا هتجيبي عدس وفول مثلا ودقيق وتعملي بيتزا أو كيكة، لأن مش كل يوم هتطبخي حاجة فيها لحمة وتبدأي تنوعي كل يوم حاجة، وبالهنا والشفا يا ست الكل هيكفوا معاكي إن شاء الله لآخر الشهر وربنا يكرمك ويوفقك ويعينك".

ونصحها زياد جاد: "الصدقة والاستغفار وبأقل من كده"، وردت سهام فوزي "حاولي لما الحاجة ترخص زي الطماطم مثلًا هاتيها وحطيها في الفريزر.. أنا بجيب الطماطم والبازلاء والفاصوليا والقلقاس والسبانخ والملوخية.. كل ما ألاقي حاجة رخيصة أجيبها وأفرزها ولما الظروف تبقى صعبة أطلع وأطبخ.. وبعمل اللانشون والطعمية كله في البيت".

وأضافت سهام:" حاولي تمشي أمورك.. أقسم بالله العظيم أعرف واحد صاحب جوزي بيقبض 8 آلاف جنيه ومراته مدرسة، وبيقول ظروفه وحشة وعايز يسافر.. كلمة الحمد لله والرضا وأشوف اللي أقل مني أحمد ربنا على اللي أنا فيه.. أنا معنديش مرتب ثابت مع جوزي وبعمل زي ما بقول وبحمد ربنا...".

وعلقت رشا مصطفى "حاولي تقسمي المبلغ على أربع مرات وحطي كل مبلغ في ظرف وأوعي تفتحي الظرف قبل ميعاده، انزلي هاتي لحمة، نص لحمة وفرخة وخضراوات وأرز وفاكهة على بقوليات وعدس أصفر وعدس بجبه على لوبيا على فاصوليا وهاتي بانيه أو فرخة كبيره خلية يخلي الصدر واعملي بانيه أو نجرسكو هاتي باذنجان واعملي مسقعة هاتي نص كبدة في يوم وجنبه ومكرونة وطبعا طلعي أولا صدقة من المبلغ عشان ربنا يبارك فيه".