كنباوى وكنباوية .. حلقة رقم (33) .. جحا يحكم المدينة!!

"كنباوى" يمر فى الصالة فيرى "كنباوية" تتصفح جريدة، فيدور بينهما هذا الحوار:
"كنباوى": إيه يا "كنباوية".. إنتى سبتى النت وحتقرى جرايد؟
"كنباوية": النت مفيش غنى عنه.. أنا بس سمعت إن الجورنال ده عامل حوار مع أبو اسماعيل قلت أقراه.  
"كنباوى": هو الراجل ده ربنا مش حيقدّره على الخير أبدًا؟ عمال يلطش ويتكلم ويهدد كده على طول؟!
"كنباوية": الراجل ده لازم يكون ورا القضبان، ده عياره فلت، وصل بيه الحال إنه يهدد الجيش والمصريين.  
"كنباوى": ماهو مش لاقى رادع، كل ما يتطاول ما بيلاقيش حد يوقّفه عند حده، لازم يتمادى ويعمل أكتر من كده، المثل بيقول: "سكتناله دخل بحماره".  
"كنباوية": الراجل بيتريق على التوكيلات اللى الشعب عملها للسيسى وبيقول ما احنا كمان نقدر نخلى الناس تعمل لنا توكيلات، ولو الجيش نزل احنا كمان حننزل.  
"كنباوى": ده تبجح وتهديد صريح.. الجيش ساكت عليه ليه مش فاهم!!
"كنباوية": الجيش صابر عليه لحد ما غلطاته تكتر أكتر.. علشان عقابه يكون أكتر، الجيش سايب له الحبل على الغارب علشان يشنق بيه نفسه.  
"كنباوى": وإيه أخبار النائب العام؟
"كنباوية": راح شغله ولا كأن فيه قرار وحكم صدر ضده بترك المنصب، والأدهى من كده إنه عمل استدعاء لباسم يوسف بيتهمه فيه بازدراء الأديان والتطاول على مرسى.  
"كنباوى": وباسم عمل إيه؟
"كنباوية": لسه مفيش أخبار، ماحدش عارف باسم حيروح له ولا مش حيروح، الله أعلم.  
"كنباوى": وأخبار جحا إيه؟
"كنباوية": جحا مين يا راجل ؟
"كنباوى": هو فيه جحا غيره؟!! مرسى طبعًا.. جحا يحكم المدينة.  
"كنباوية": جحا كان عاقل وواعى وناصح، لكن الصفات دى ما بتنطبقش على بسلامته، ده بيتصرف تصرفات عشوائية فى كل حاجة.  
"كنباوى": هو لسه بيشحت علينا؟
"كنباوية": هو بإيده حاجة غير كده؟!! حيجيب منين غير الشحاتة.  
"كنباوى": هى كده بانت.. مشروع النهضه بتاعهم أصله مشروع شحاتة، إنتى مش واخدة بالك إن الشحاتين زادوا فى عهد الإخوان، وكل ما تمشى فى شارع تلاقيهم مادّين إيديهم بيقولوا: لله يا محسنين!!
"كنباوية": عندك حق.. إحنا شحتنا على إيد الإخوان، وماحدش عارف بكره حنعمل إيه.  
"كنباوى": بكره ربنا يتولانا برحمته، ومشروع الصكوك أخباره إيه؟
"كنباوية": الأزهر طالب إنه يتعرض على كبار العلماء، لكن لو مرسى أقره البلد حتولع.  
"كنباوى": وأخبار جبهة الإنقاذ إيه؟
"كنباوية": لسه الوضع مش محدد المعالم، وحمدين صباحى فى تونس.  
"كنباوى": بيعمل إيه؟
"كنباوية": بيتناقش مع رئيس تونس فى وضع البلاد بعد ثورات الربيع العربى.  
"كنباوى": وهو ده وقته إنه يسيب مصر ويسافر؟
"كنباوية": ده ده مش رئيس، فما بالك بالرئيس اللى واخدها سفريات على طول، البلد تولع ماتولع، وهو ولا هو هنا، على طول مسافر، ولا كأن بيحصل حاجة فى البلد، ده عايش فى البلالة، ربنا يكون فى عونا وعون البلد.  
"كنباوى": أنا زهقان حنزل اقعد على القهوة شوية أسرى عن نفسى.  
"كنباوية": وانا كمان زهقانة، حدخل أريح جسمى شوية يمكن أقوم من النوم فايقة، ويمكن يكون الحال اتغير وحصلت حاجة تبشر بخير.  
"كنباوى": ماشى، خشى انتى نامى وأنا حنزل، ولما اطلع حصحيكى.. نوم العافية والراحة.