يوميات صايم.. حلقة رقم (1)

هو موظف ومدخن شرس.. عصبي جدا في شهر رمضان.. إلا أنه فكر وقرر هذه المرة أن يكتب يومياته ولكن بشكل ساخر حتى ينتصر على النكد الذي يحاصر به عائلته كل عام.
عاد من عمله صرخ في زوجته أنتي فين ياهانم؟
زوجته: حمد الله على السلامة مع ابتسامة رقيقة حتة تهدأ أعصابه شوية.
صايم: جهزتى الفطار.. أكيد لسه ما أنا عارفك أنتى غاويه تعذبيني آه حرام عليكي خافي ربنا بقى. 
الزوجة ضاحكة: طبعا حرام لكن إذا كنت جهزت تعمل إيه يا حبيبي.. مع أن قاعد على المغرب 3 ساعات؟
صايم يرفع يديه إلى السماء: يارب سامحها معقوله فيه حد في الدنيا يا ست يحضر الفطار قبل المغرب بتلات ساعات عشان يبرد ويبقي طعمه مش حلو ليه حرام عليكي أنا صايم وبروح الشغل كل يوم حرام خافي ربنا انتي إيه؟
الزوجة ضاحكى: احنا الفطار بتاعنا لسه قدامه ساعتين وأنا عملت الأكل بتاع ماما.
صايم يصرخ: طبعا الست والدتك أهم مني طبعا ماهو انا لو مهم عندك كان عملتى الأكل بتاعنا قبل ماما لكن أنتي عايزة تحرقي دمي وخلاص واحنا في شهر مفترج وعايزة الجيران تقول على مجنون ومش قادر على الصيام صح؟
الزوجة ضاحكة: على فكرة الأكل بتاع مامتك وأنت عارف يا حبيبي مقدرش أزعلها والجيران عارفين كويس مين صايم حبيبي قطع لسان اللي يقول عليك حاجة يا حبيبي ده أنت بلسم مظبوط الكلام؟
صايم: هو أنتي فاكراني عيل بتضحكي على _يدخل غرفة النوم ويصرخ _يا هانم.
تيجي الزوجة بسرعة: نعم يا حبيبي. 
صايم: أنتي مش مرتبة أوضة النوم ليه يا هانم هو أنتي مش عارفة إني جاي من الشغل تعبان واكيد عايز أنام حرام عليكي أنتي إيه مش خايفة من ربنا خالص ده إحنا في شهر الخير وشهر فضيل صح؟
الزوجة ضاحكة: طبعا صح هو أنت بتقول حاجة غلط أبدا حاضر يا حبيبي بس خلي بالك أنا مرتبة الأوضة لكن ارتبها تاني عيوني.
صايم يدخل الحمام ويصرخ: أنتي يا هانم أنتي ايه مفيش مخ يفكر؟
الزوجة: خير يا حبيبي فيه إيه تاني؟
صايم: إنتي مش عارفة إني جاي من الشغل تعبان وأكيد محتاج أخد حمام حرام عليكي أنا تعبت ياناس مراتي عايزة تخليني افطر ده يرضي حد ده؟
الزوجة تقعد على الكرسي: لا كده كتير الناس كلها صايمة حرام عليك أنت بقي.
صايم يصرخ: وكمان بتردي على وأنا صايم طيب بس لما أفطر.
الزوجه: المغرب باقي عليه 5 دقائق.
صايم: وحياة أبوكي الله أكبر الحمد لله أول يوم عدي عقبال آخر يوم ألف شكر يا حبيبتي على انك استحملتيني!