بالفيديو.. "البحر بيضحك ليه" من إبداعات الشيخ إمام
البحر بيضحك ليه
وأنا نازلة أدلع أملا القلل
البحر غضبان ما بيضحكش
أصل الحكاية ما تضحكش
البحر جرحه ما بيدبلش
وجرحنا ولا عمره دبل
مساكين بنضحك من البلوة
زي الديوك والروح حلوة
سارقاها من السكين حموة
ولسة جوا القلب أمل
قللنا فخارها إناوي
بتقول حكاوي وغناوي
يا قلة الذل أنا ناوي
ما شرب ولو في الميه عسل
والبحر بيضحك ليه … ليه
وأنا نازلة أدلع أملا القلل
ياما ملينا وملينا
لغيرنا وعطشنا ساقينا
صابرين وبحر ما يروينا
شايلين بدال العلة علل
والبحر بيضحك ليه … ليه
وأنا نازلة أدلع أملا القلل
في بالي ياما وعلى بالي
واللي بيعشق ما يبالي
ما يهمنيش من عزالي
يا حلوة لو مرسالي وصل
والبحر بيضحك ليه ليه
وأنا نازلة أدلع أملا القلل
بيني وبينك سور ورا سور
وأنا لا مارد ولا عصفور
في إيدي عود قوال وجسور
وصبحت أنا في العشق مثل
والبحر بيضحك ليه
وأنا نازلة أدلع أملا القلل
