ساخرون.. إسماعيل ياسين في حديقة الحيوانات: آه يا شلاضيمى يانى يا ماماااا

يا داهية دقى ووسعي لى بُقى.. ما هذا الذي يحدث في حديقة الحيوانات.. حريقة وماس كهربائى وحيوانات بتموت ورا بعضها والزرافة حبيبتى مريضة والنسناس حالته تصعب على "الناس".. إننى أشعر بالانعياى.. آه والنبى أنا عيان حد يلحقنى بدكتور أمراض عقلية.. فالإهمال يضرب في حديقة الحيوان

بقى في شهر واحد تحصل كل الكوارث دى في المكان اللى بنروح نشم نفسنا فيه؟!.. ده أنا اتربيت وسط الحيوانات اللى هنا وكلهم أصحابى.. انا متهيأ لى إن والدتى اتوحمت على نسناس.. علشان كده أنا شلاضيمى تشبه شلاضيم النسانيس.. آه يا شلاضيمى يانى يا مامااااااااا

الفيلة "نعيمة" ماتت من أسبوعين ودى آخر أفيال حديقة الحيوان.. هتوحشينى يا نعمعم.. والنبى ابقى سلميلى على الفيلة "كريمة" اللى ماتت من سنتين وقالولنا هيجيبوا واحدة مكانها وماجابوش.. الزرافة "سونسون" حبيبتى مريضة بقى لها شهر.. وهذه آخر زرافة في الحديقة.. أنا مش عارف لو ماتت هنجيب غيرها منين وأزاى.. ده حتى البند بتاع ميزانية شراء حيوانات اتلغى من الموازنة العامة.. آه يانى يا حيواناتى آه..

ده حتى الشامبانزى كان هيتحرق من كام يوم لولا ستر ربنا.. كل ده في شهر واحد.. أنا مش عارف أحزن على الحيوانات ولا على البنى آدمين.. ده البنى حيوان والبنى آدم.. الاتنين حكايتهم فلقانى.. مين منهم قولولى يا عالم.. حقه يتفرج عالتانى؟! أنا أعرف مليون إنسان.. وأمورهم دى هتجننى.. لو قلت ده شبه الحيوان.. أخاف الحيوان يزعل مني.. آدى مثلا حيوان ومخطط.. وأفندى شيك قد القول.. الشاطر فيكم يعرف لى.. مين الحيوان مـ الاتنين دول؟!وآدى فيل كان عايش عال.. كان بيشيل على ضهره الأطفال.. والفيل دا حكايته مفهومه.. وآدى راجل شايل أولاده.. والفرق ما بينهم زلومة.. آدى الحيوان والبنى آدم.. مين منهم بالذمة يا عالم.. حقه يتفرج عالتانى؟!!
يا إخوتى في الله.. اسمعوا وعوا.. الحديقة بتكسب كتير ما شاء الله.. اصرفوا منها عليها.. وبلاش تبخلوا عليها.. ده إحنا وأطفالنا اتربينا وسطيها.. ولن أقول أكثر من ذلك.. يلا بقى.. سلامو عليكووووووووووووووو