لايف كوتش: «مفيش زوجة مثالية»
قال أيمن فتيحة لايف كوتش وخبير في العلاقات وتحرير الصدمات، إن هناك ما يسمى بهوس الزوج المثالى والزوجة المثالية، لكن الحقيقة التي يجب أن يدركها الجميع أنه "مفيش حد مثالى ولا أم مثالية ولا أب مثالى ولا أخ مثالى ولا أخت مثالية ولا ابن مثالى ولا زوج مثالى ولا زوجة مثالية، فالجميع بشر، بشر يعنى يصيب ويخطئ، يعنى مبسوط وزعلان، يعنى كويس ومقصر، يعنى الضدين موجودين، فبلاش نحمل نفسنا ونحمّل الآخرين فوق طاقتهم، كلنا فينا الحلو والسيئ، ودورنا نزكى أنفسنا".
وأضاف فتيحة: "الزوجة هي اللى ضحت وسهرت ونامت وقصرت وتعبت وطبطبت وحضنت وأصابت وأخطأت، والزوج هو اللى اشتغل وتعب وطبطب وزعق وغضب وساب البيت وخرج مع صحابه وفسح الأسرة ونشر الأمان وأكرم زوجته واختلف معاها".
وتابع: "طالما أننا بصدد مدح وتزكية شيء مثالى، فذلك يعنى أن هناك خللا وأخطاء وسلبيات، فمنطقى أن نحترم الإيجابي والسلبي اللى جوانا وجوا غيرنا ونشتغل على تطوير نفسنا درجة درجة، مش معنى كده أن تستمر مع حد بحجة أن كل الناس عندها الإيجابي والسلبي، فهناك سلبيات مناسبة لك يمكنك التعايش معاها، وهناك سلبيات لا يمكنك التعايش معها، تناسب غيرك ولكن لا تناسبك، متجبرش نفسك على حاجة، بس اسأل وافهم وخد وقتك دايما، عشان تكون متزن ومرتاح، وتأكد أنه مفيش حد مثالى، ومحدش إيجابي بس ولا سلبي بس، كل إنسان جواه تركيبة من الإيجابي والسلبي، والشاطر اللى شغال على نفسه ويرتقى بها بالتدريج، واحدة واحدة على نفسك عشان دى نفسك".
