بالصور.. مواقف إيجابية للرجال تشجع الفتيات على الزواج.. ضحى: «جوزي بيعتذرلي بورد».. أفنان :«بيقطعلي البصل».. شيماء: «بيروق الشقة».. هاجر:«بيعشيني أحلى عشا».. وإ
عرضت إحدى الصفحات عبر مواقع التواصل الاجتماعي «فيس بوك»، مجموعة من المواقف الإيجابية التي تدفع وتشجع الفتيات والشباب على الزواج.
- بيقطعلي البصل
قالت ضحى: «مرة جابلي بوكيه ورد محترم جدا عشان يعتذرلي أنه أتأخر وسابني مستنياه في البيت كتير لوحدي"، وأضافت زهرة: "جوزي وأنا حامل كان قبل ما ينام يجبلي طبق فيه فاكهة غاسلها ومقطعها بشكل حلو ويحطها جنب السرير، وأنا كنت أقوم بليل أكل وأنام».
وقالت أفنان: «لو محمد في البيت وأنا في المطبخ بطبخ مستحيل يكون سايبني في المطبخ ويعمل هو حاجة تانية.. هيكون واقف معايا مونسني وبيعمل أكتر ما أنا بعمل.. مبيسبنيش أقطع البصل عشان معيطش أنا ويعيط هو وأكله بيطلع أحلى من أكلي أصلا».
- بيروق الشقة
وأضافت شيماء: «أحمد دايما بيساعدني في كل حاجة.. ترويق الشقة طبيخ ساعات ببيقى جاية تعبانة من الشغل وهلكانه وهو كمان جاي في نفس الميعاد معايا يقولي خلاص أنا اللي هعمل الأكل ومش هياخد في أيدي ساعة، ولما بتكون المواعين كتير عليا بيقولي سيبها وأنا هغسلها عنك.. دايما بينشر الغسيل لأني بكره النشير بجد ربنا يبارك فيه بيخفف عني حاجات كتير».
- اتجوزوا الجواز نعمة
وقالت هاجر: «كل فترة ألاقيه دايما يجيبلي ورد جميل أوي وشيكولاته من اللي بحبها وساعات يشوف اللي ناقص عندي ويجبهولي من غير ما اطلب زي كريم للشعر مثلا.. أوقات كتير هو اللي يطلب أكل بالليل ويعشيني أحلى عشا لو تعبانة ودايما الله يباركله يدخل السرور على قلبي ولو بحاجات بسيطة وفي أوحش حالاتي يقولي إني جميلة وحاجات حلوة كتير.. اتجوزوا يا جماعة الجواز نعمة وادعولي عشان هولد خلاص».
وتابعت إسراء: «المياه عندنا بتقطع في أوقات معينة في اليوم خصوصا الصبح.. زوجي بيخرج الصبح قبل ما اصحى من النوم كنت في الشتا بصحى من النوم ألاقيه مالي طبق في الحمام مياه سخنة عشان لما أصحى ما استخدمش مياه ساقعة.. دي حاجة بسيطة جدا بس عمري ما بنساها وبدعيله عليها».
