«أمك يعني إيه» قصيدة للشاعرة هناء نوار
أمك.. ثم أمك.. ثم أمك
يعني إيه؟؟
يعني حضن أكيد يضمك
وأنت مطمِّن إليه
أمك..
يعني حد يشيل فِ همك
من غير ما أنت تحس بيه
وأنت إيه فِ الكون يهمك
غير وتد.. تسند عليه
والحكاية مش أبوك
ولا خالك.. ولا عمك
لا دي حاجة غصب عنك
شئ مالِكش يَد فيه
واوعى تغلط يوم وتسأل
طب حنانها مقابل إيه
لو طلبت عنيها..
تقبل تديها لك
أمّال أنت فاكرها إيه
حاجة سهلة؟؟
لما تبقى الجنة منها
وأما ربك يحكي عنها
يبقى إيه
لما ربك يرزقك..
علشان خاطرها
لما ابنك يرحمك
علشان راحمها
يبقى إيه
لما تفضل عايشة تدعي
طول حياتها
لما باب م الجنة يقفل
يوم مماتها
لسة برضو مُصِّر تسأل
الأمومة يعنى إيه!!
