أطرف المكالمات التليفونية.. طارق: «قولت لواحدة غريبة صلي وادعيلي».. مجدي: «بتقولي بحبك يا محمد قولتلها أنا بحبك أكتر منه».. أحمد: «جننا مرات أخويا».. وروما: «طلب سمك
يرن هاتفك برقم لا تعرف صاحبه فتجيب ومع أول كلمة من الطرف الآخر تكتشف أنها مجرد معاكسة أو شخص أخطأ في طلبك، لكن تلك المكالمات تتحول أحيانا إلى مواقف طريفة.
روى مستخدمو موقع التواصل الاجتماعى "فيس بوك"، أطرف المكالمات التي تلقوها عبر الهاتف وذلك من خلال سؤال طرحته صفحة "الكومنت الجاحد" عبر فيس بوك.
- أنا مجدى وبحبك أكتر من محمد
قال مجدي: "في مرة رقم رن عليا وطلعت واحدة وفضلت تقول أنا أسفة يامحمد إني زعلتك وأنا بحبك بجد وبموت فيك وأرجوك ارجعلى وصوتها جميل جدا، فأنا مكنتش عايز أقولها النمرة غلط بس أول مارديت وسمعت صوتي قالتلى إنت مين قولتلها أنا مجدي وبحبك أكتر من محمد أرجوكي ما تسيبنيش".
- أسئلة مش منطقية
وأضافت روما: "طب أنا واحد كلمني ولقيته بيقولي عبد الموعود موجود؟ أنا قلت لا النمرة غلط.. طب ابعتلي كيلو سمك وفراخ قولتله إنت بتستظرف؟ قالي أمال بتكلم جد إنتي بتسألي أسئلة مش منطقية".
- الخط الجديد
وقالت جهاد: "واحد كل يوم يتصل يقولي ألو ميرنا موجودة؟ أقوله لأ الرقم غلط يقولى آسف ويقفل، كل يوم يتصل يقولي ميرنا موجودة وأنا أقوله غلط يقفل ويتصل تاني يوم، في يوم زهقت من الاشتغالة دي، فبيقولي ألو ميرنا موجودة قولتله أيوة أنا ميرنا أؤمر حضرتك فصل ضحك قاللي طب بلاش ميرنا حنان موجودة".
وأضاف تامر: "أنا لسه شاري خط موبايل جديد وكل شوية يرن حد يسأل على مدام ماجدة أقوله لا والله النمرة غلط، آخر واحد بقى بقوله أصل أنا اشتريت الخط الجديد يرد ويقولي ماشي ماشي ياعم يعني إنت مش مدام ماجدة".
- معجبة أخويا
وقال أحمد: "كنا بنفطر أنا وأهلي ورقم رن على أخويا وطلعت واحدة بتعاكسه والغريب إنها عارفة اسمه، فجأة مراته وشها اتغير وتقوله مين دي كل شوية زن زن ويقولها طب استني لما اقفل معاها، آخر مازهق قال لأمي خدي شوفيها وأمي تقولها انتي تعرفيه تقولها دا أنا معجبة بيه من زمان أيام ما كان بيبعتلي الجوابات والرسايل الغرامية، مرات أخويا اتصدمت وفي الآخر طلع مقلب من أختي".
- صلي وادعيلي
وأضافت سما: "أنا واحد بيكلمني وبيعاكس وكنت مطبقة بقالي يومين ولسه داخلة أنام.. قلتله حرام عليك هو أنا هلاقيها منك ولا من جوزي والعيال ولا من الشغل ولا من البيت ارحموني نفسي أنام.. صعبت عليه وكان هاين عليه يقولي طب نامي وأنا هاجي آخد بالى من العيال وقعد يعتذر.. مع العلم إنى لسه سينجل".
وقال طارق: "أيام الشقاوة واحدة كلمتني ليلة امتحان وكانت نمرة غلط واعتذرت وبتاع وقفلت المهم الشيطان فضل يوسوس إنى أكلمها تاني وأنا قاعد أذاكر اكتشفت إني ذاكرت محاضرات مش داخلة أصلا في الامتحان قلت خربانة خربانة وروحت مكلمها.. مساء الخير قوليلي إنتي سهرانة للفجر؟ هي: أه ليه؟.. أصل عندي امتحان الصبح فتصلي وتدعيلي".
- الصبح هتلاقيها عندك
وأضافت مروة: "مرة واحد اتصل عليا وأول مارديت وقلت ألو قالي بصوت واطي حد جنبك أنا وطيت صوتي أنا كمان واندمجت وقولتله لأ قالى وحشتيني.. قولتله لحد كده واستنى إنت عاوز مين؟؟ قالي مالك إنتى لسه زعلانة.. قولتله لا أنا مش زعلانة أنا مش هي وصبني هستيرية ضحك وقفلت بعدها بساعة بعت قال أنا آسف.. عقبال ما فاق من الصدمة".
وقال علي: "مرة واحد رن عليا متأخر وكنت عايز أنام كان بيقولي ياحاج أحمد دا شيطان ووقع بينا وإحنا آسفين وبنتك لازم ترجع.. قولتله ياعم الحاج هنام دلوقت والصبح هتلاقيها عندك".
