غراب البين: البشر بيكرهونى علشان شايف بلاويهم بعيونى

أنا الغراب قاق قاق.. مش هسكت ولا هبطل نعاق.. من شجرة لشجرة ومن بيت لبيت هلف براحتى وأبدًا ما هنساق.. موجود فى الخرابات وقدام أفخر المولات.. براقب بلاوي البنى آدمين بعيونى.. علشان كدا بيتشائموا منى وبيكرهونى.. وكل نعقه تخرج من حنجرتى بكون شايف بلاوى زبونى

وهنا وفى هذه المساحة هكتبلكم بريشتى السودة المنحوسة عن كل اللى بشوفه قدامى من بلاوى البنى آدمين.. سواء فى مصر أو حتى فى الصين.. وأهى حاجة أسلى بيها وقتى بدل ما انا مقضيها نعيق فى الشوارع عمال على بطال

لكن مش عايزكم تتشائموا منى لما تقرأولى زى ما بتتشائموا منى وانتم بتشوفونى.. علشان انا هنا هحاول اتعامل معاكم وكأننى بنى آدم.. ماهو ياما بنى آدمين بيتصرفوا تصرفات غربان وانتم راضيين بوجودهم حواليكم.. عموما تعالوا نجرب بعض يا بنى آدمين وجايز تكتشفوا انى انا غراب مسكين مش زى ما بتوصفونى دايما بغراب البين!