كابتن ماجد يوجه رسالة إلى "فايلر"

طبعا مبروك للأهلي اللى استعاد كبرياءه الإفريقى بعد فوزه على صن داونز بثنائية ولا أروع، وبكده نبقى عبرنا نصف المشوار لتخطى عقبة هذا الصن داونز العنيد، أما النصف الثانى فهذا شُغل مدربين أكثر منه شُغل لاعبين..

وأنا هنا حابب أوجه رسالة للأخ "فايلر" مدرب النادي الأهلي وعايز أقول لمعاليه إن الفرحة حلوة مافيش كلام، بس برضو يا عمنا ماتطمنش أوى علشان اللعب في جنوب أفريقيا هيكون مختلف عن اللعب في القاهرة.. والدليل هو الخمسة أهداف اللى عايزين ننساهم برجوعكم فايزين بأى نتيجة أو حتى متعادلين..

المهم وكما قلت لك من قبل وفى نفس هذه المساحة "إن الهدف هو إخراج صن داونز من البطولة بأقدام أهلاوية" فهذا وحده كفيل بمحو ذكرى الخمسة أهداف المأساوية، واعلم يا عزيزى، أن ما حققتموه من فوز بثنائية معلول هو مجرد نتيجة جيدة، إلا أنها مازالت لم تحسم الأمر، وأن لقاءكم بصن داونز على أرضه ووسط جماهيره سيكون في غاية الصعوبة.. فاستعدوا بكل طاقتكم..

وياريت يا فايلر يا ابن عمى تبدأ بـ"إليو بادجى" وبلاش تنزل "مروان محسن" اللى حرق دم ثلثى الشعب المصرى في الشوط الأول من المباراة السابقة، يعنى ياريت نغير السيناريو بتاع الشوط الأول من المباراة السابقة كاملا دفاعا وهجوما، وتستبدله بسيناريو آخر مختلف وليكن قريبا من سيناريو الشوط الثانى وبدون أي إضافات.