رئيس التحرير
عصام كامل
Advertisements
Advertisements
Advertisements

ساخرون.. إسماعيل ياسين في الأوكازيون الشتوى: «عشانا عليك يارب»

فيتو

يا فتاح يا عليم يا رزاق يا كريم.. أوكازيون إيه وهباب إيه اللى أنت جاى تقول عليه.. قال أوكازيون قال.. والبياع واقف في وسط المحل مستلوح ولا كأنه بيعطف علينا.. إننى أكاد أن أخرج عن شعورى.. ما هذا الذي تتشدق به شلاضيمى.. إننى في منتهى الانسفاف.. نعم إننى متأنسف ياخويا منك له له لها لها.. الله يخسفك في سابع أرض يادى الجدع اللى بوظت أعصابى.. قال إيه ياخويا كل محل عاملى تخفيضات تصل إلى 70% على الملابس الشتوية.. لا والنبى ياخويا أكلت بعقلى مهلبية.


طب وشرف عمى اللى اشترى التروماى وماركبوش بتاتا البتة.. الأوكازيونات دى وهم في وهم.. وأنا لازم اشتكى تلك الأوكازيونات الوهمية لوزارة التموين والتجارة الداخلية.. الحقنى يا حاج "مصيلحى" يا ساكن ديوان الوزارة.. الحقونى يا بتوع حماية المستهلك ده أنا لو اشتريت جاكت واحد مرتب الشهر هيستهلك ويروح في داهية وياخد معاه فلوس الجمعية.. وهقعد أغنى ظلموه واقول "عشانا عليك يا رب"

يا أخى اشتاتا أشتوت.. ده انت عايز الضرب بالنبوت.. طب لما الأسعار دى أسعار أوكازيون.. أمال أسعار المش أوكازيون هتبقى إزاى.. هي فين الحملات المفاجئة اللى بتلف على المحال.. فين بتوع الرقابة التجارية.. فين العدس والملوخية.. آه يا خراب بيتك يا سمعمع

طب أنا بقى راسى وألف جزمة لازم أعرف إزاى المحالات دى أخدت تصاريح بعمل أوكازيون بمثل تلكم الأسعار.. ده السعر قبل الخصم زايد بنسبة 30% وبرضو التخفيض عليه لا يتعدى 30%.. فينك يا مباحث التموين تلحقى المواطن المسكين من أولئك المبتزين

يا ناس دى الدول بتعمل الأوكازيونات علشان تجذب السياح.. وإحنا مش عارفين نبقى صادقين ونجذب أهل البلد بالصلاة على النبى.. ده أنا فقدت الثقة خلاص في كل التجار حتى تجار الأحذية اللى كنت فاكرهم طيبين.. آه يانى يا فاقد الثقة في التجار يا سمعمع.. ده أنا متابع أسعار السوق من قبل بدء الأوكازيون بشهر والأسعار كانت أقل من كده بكتير..
عموما سأسكت.. نعم إننى سأسكت وسأنقشع.. يلا بقي.. سلامو عليكووووووووووووووو
Advertisements
الجريدة الرسمية