ساخرون.. كابتن ماجد: «ادى ضهرك للملعب الأهلي صفيح»
أنا بصراحة أول مرة في حياتى أشوف فريق كل لاعبيه يعانون من الإصابات.. ده حتى رئيس النادي متصاب.. ده إيه ده يا جدع.. ده كمان طبيب النادي مُصاب، وعنده برد له يومين أو جايز يكون عامل نفسه مُصاب.. لدرجة إنى شاكك أنه عميل مزدوج وبيدى اللعيبه علاج خاطئ علشان يخسروا الدوري.. ده أنا شاكك كمان أن مدرب الأحمال بتاع الأهلي مُصاب.. ما هو يا إما مصاب يا إما زملكاوى يا إما دماغى هتاخدنى بعيد، وممكن أفكر أنه واخد ساعة "رولكس" من بتوع "آل الشيخ".. وعلشان كده سايب اللعيبة تسترخى براحتها ومُعرضة للإصابات
ده حتى الجمهور أصبح مُصاب بالاكتئاب.. أنا نفسى حاسس إنى مُصاب.. طب إيه بقى حكاية اللقب بتاع "الأهلي حديد" دى.. أنا شايف إننا نغير اللقب ونخليه الأهلي صفيح.. ما هو الصفيح برضه حلو وبيشيل كتير.. زى الأهلي كده ما هو بيشيل من المقاولين والاتحاد بالتلاتة والأربعة.. طب علشان ما حدش يزعل من لقب صفيح ممكن نخليها "الأهلي ملبن".. آه حلو الملبن ما فيش كلام.. حاكم أنا بحس أن لعيبة الأهلي زى الملبن أقل خبطة بتنيمهم بالشهرين..
