آيتن عامر بعد تعرضها للهجوم بسبب «التخسيس»: مش هقدر أحل مشكلة الغلاء
ردت الفنانة آيتن عامر على الهجوم الذي تعرضت له خلال حلقتها مع الإعلامية منى الشاذلي في برنامج "معكم"، بعد عرض مشكلة زيادة وزنها، حيث هاجمها عدد من متابعيها لاعتقادهم أن هذه المشكلة ليست ضرورية لعرضها، مؤكدين لها أن هناك قضايا أهم من التخسيس.
وقالت آيتن "أيوه في مشكلات أهم وأعمق من المشكلة بتاعتي اللي تناولتها مع الأستاذة منى الشاذلي، لكن خلينا نشوفها بشكل تاني، ليه منقولش إن تجربتي دي ممكن تبقى حافز لناس كتير نفسها تخس وظروفها المعنوية أو المادية مش مساعداها خصوصا أن الدكتور وافق أنه ينزل الأنظمة الغذائية كاملة دون أي مقابل".
وأضافت، "ليه منقولش إن دى تجربة فعلية تخلى الناس اللى بيتضحك عليها باسم عمليات التكميم وتحويل المسار وبيبقى عندهم استعداد يبيعوا دهبهم ويعملوا جمعيات عشان يعملوا العملية مع إن من الممكن منضرش صحتنا ونخش أوض عمليات ونعمل دايت وتخس ومنتكلفش كل الفلوس دى".
ولفتت "ليه الحلقة دى متكونش بتهون على كل واحدة لسه مخلفة ووزنها زايد وعندها اكتئاب وبتوريها إنها مش لوحدها اللى بيحصلها كدة وانى كممثلة لا أتميز عنها بشيء سوى الإرادة وأشجعها تبدأ معايا".
وتابعت آيتن، "بلاش هجوم بلا داعي، أنا مش هقدر أحل مشكلات الكون ولا مشكلة الغلاء، لكن ممكن أكون مصدر إلهام لبنات كتير وأساعدهم على الوصول لحلم صغير، لأن هو ده اللى هقدر عليه".
