السخرية من دينا الشربيني تثير غضب النشطاء.. كندة علوش: هجوم سخيف وتنمر.. آية حجازي: دي فنانة أحب اتفرج عليها مش ناس بلاستيك.. إيمي: نفسنة رهيبة.. محمود: قلبها أبيض وأنتوا وحشين
اعتبر نشطاء مواقع التواصل الاجتماعي، "فيس بوك وتويتر"، السخرية من الفنانة دينا الشربيني نوعا من أنواع التنمر، مؤكدين رفضهم وضرورة مكافحة التنمر بجميع أشكاله على جميع طوائف المجتمع.
وانبرى عدد كبير من النشطاء للدفاع عن الفنانة دينا الشربيني من خلال هاشتاج دشنوه لهذا الغرض، وكشفوا من خلاله عن الجوانب المضيئة التي تميز دينا، ويغفل عنها كثيرًا من جمهورها.
التنمر
وقالت الفنانة كندة علوش "#التنمر ليس قسرًا على الأطفال، فالهجوم السخيف والمؤذي الموجه ضد الفنانة #دينا_الشربيني وفنانات كثير غيرها هو أبشع أنواع التنمر، إن لم يعجبك فستان هذه الفنانة أو تلك فعبر عن رأيك بأدب، أما السخرية من الشكل بسبب زاوية تصوير سيئة أو فقدان الوزن أو زيادته أو..إلخ فهو فعل عنصري لا إنساني".
ودافعت الحقوقية آية حجازي عنها: "دينا الشربيني، شخصية فعلا لطيفة ومحترمة واجتماعية، كانت معاملاتنا طفيفة، وإحنا محبوسين مع بعض في عنبر واحد بس تعاملاتها مع الناس كلها كويسة جدا، واللي لمسني معاملتها مع طفلة شوارع، دينا ساعدتها بكل الأشكال، وساعتها البنت ورتني رسالة ليها دينا بتقولها: أنا معاكي ودي نمرتي كلميني أول ما تخرجي وأخرج وممكن أوفر لك شغل معايا".
واستطردت آية حجازي: "وكمان حاولت تشغل وقتها ووقت الناس بكورس تمثيل داخل السجن، لكن اتغير رئيس المباحث على طول ولغاه، وكمان كانت من الناس النادرة اللي بتخرج وتفتكر صحابها، وتيجي تزورهم في السجن وتجيبلهم زيارات، هي دي الفنانات اللي أحب اتفرج عليهم، مش ناس بلاستيك بنتفرج على شكلهم وننسى فنهم أو هما مين، كنت فعلا مترددة أكتب عنها، بس أعتقد ده واجبها على، كامرأة وكإنسان، وللبنات المنفسنة، مش عارفة إزاي الست ممكن تاخد حقها في العالم ده، لو أول ظالم ليها المرأة، من نجاح لنجاح يا دينا".
نفسنة
وعلقت إيمي شوقي: "نفسنة حقيقية، في نفسنة رهيبة على دينا الشربيني، من غير أي سبب، أكتر من إننا منفسنين من جوا أوي، دينا الشربيني مش ضرتك عمرو دياب، مش إبن عمتك اللي كنتي بترسمي عليه شيرين رضا حلوة، وزي القمر أه، بس هي مش أختك في الرضاعة، يعني من الآخر كده خليكي في حالك".
وتابعت إيمي: "دينا ممكن متكونش أحلى واحدة في الدنيا، بس مين فينا ملكة جمال، ومين فينا على طول بتلبس صح، ومافيش فستان بيقلش منها، بس هي برضوا حلوة وصغيرة، ودمها خفيف، وشقية كده في نفسها، وبعدين ميبقاش حلم حياتك إنك تروحي الجونة تقعدي يوم وبعدين تقعدي تتريقي على واحدة عمرو دياب اختارها من وسط ملايين وبتتصور على الريد كاربت في الجونة، وإنتي موبايلك بيهنج أصلا، كفاية نفسنة بقى أبوس إيديكم ويا ريت محدش يزعل أو ياخد البوست بصفة شخصية".
وحشين أوي
وأضافت زياد مجدي "نعم أنا ضد التنمر، نعم أنا متنمر فهمت حاجة؟ أهو ده بظبط حال الشعب في مصر ينتقض فكرة التنمر، وفي نفس الوقت يهاجم ويقلش على طوب الأرض، وأبسط مثال لكل ده #دينا_الشربيني، وحجم السف عليها، وإنها مش زنبها أن كله مستكتر عليها عمرو دياب، على أساس أنه كان من بقيت عائلتهم".
وتابع محمود متولي: "دينا الشربيني جميلة شكلا وموضوعا، وأنا من الناس إللي اتعاملت معاها، وشوفت روحها الحلوة، وقد إيه هي إنسانة قلبها أبيض، أنتوا اللي وحشين أوووي من جوه قبل بره".
وقالت روزا رشيد "طب والله يا جماعة لازم تتعمل حملة لدعم دينا الشربيني، دي ضد كل مسدات وتويتات التنمر والكرة غير المبرر، وبدون أي ذنب اللي بتواجهه، ده اللي أكيد بتقراه كل يوم ونفسها تلاقي إجابة لطيب أنا عملتلهم إيه!".
وأضافت حسناء الدالي "كفايه كلام وتريقه على دينا الشربيني أو غيرها، كده غلط سيبوا الناس في حالها، إنتو مين عشان تقييموا غيركم! بطلوا البواخه بقا دي."
