بهلول المشغول: «اكفى على الخبر ماجور»
احنا خلاص وصلنا موسكو
نزعل ليه بقى ع اليونسكو
افرح يا ابنى دا أنت مصرى
والشمتانين هما اللى هيبكوا
اكفى على الخبر ماجور
وقول للخاين عنك يغور
اقلب صفحة وافتح صفحة
وبلاش يا ابنى دمك يفور
سيبك مـن اللى بيخلع جلده
واللى بيشمت حتى فـى بلده
بايع أهله وبايع ناسه
ولجل العملة يبيع لك ولده
اللى علينا احنا عملناه
راضيين بنصيبنا اللى اخدناه
وأنتِ يا ست مشيرة خطاب
سلمى أمرك بقى لله
وأدينا في السكة بنتعلم
مش كفايه إننا نتكلم
لازم ننضج لازم ننتج
لازم بالتعليم نتقدم
منقولش إننا أصحاب تاريخ
وفى خصومنا نقضيها توبيخ
دا العالم بقى قريه صغيره
والبدوى وصل المريخ
