بهلول المشغول: تنزل المرة دى يا حسين

خلصانة ومعاها رمانة
وخُد بدل الرمانة اتنين
ماعدتش صنافير حيرانة
وتيران معروفة لمين
سيب نفسك وما تتعب حسك
ولا تفتى وتقول دى لمين
فيه ناس بتفهم عنك
ورئيس علينا أمين
وحكومة ماهياش محكومة
من غازى ولا محتلين
ضمايرهم بالخير محكومة
ما تلاقى بينهم خاينين
ولا تنسى يامصرى إنك
ليك صوت في الدولة أمين
بيعبر عنك وعن ابنك
وبصوتك بقي نائب زين
مش ممكن هيبيع صدقنى
نائبنا مالوش وشين
ولو باعك ابقى احلق دقنى
حتى اسأل عمك حمدين
المصرى حيفضل مصرى
ما يبعش ولو شبرين
اسمعنى وعلى رأى القصرى
تنزل المرة دى ياحسين
خلصانة ومعاها رمانة
وخد بدل الرمانة اتنين
الكلمة أنا عندى أمانة
وحروفى وازنها بموازين