نشطاء يدعمون محدودي الدخل بـ«إزاي تفرحها بـ3 جنيه».. ردينة: كرمشهم في إيدها.. ديدو: كوباية شاي بنعناع على كوبري قصر النيل..إسلام:ركبها توك توك لآخر الشارع..دودو: هاتلها لبان وبالونتين تفرقعه
دشن نشطاء تويتر هاشتاج "إزاي تفرحها بــ 3 جنيه"، لابتكار أفكار جديدة وغير مكلفة للشباب المصري لإرضاع من يحبونهم دونما تكلفة، الهاشتاج جذب آلافا من نشطاء تويتر واحتل المرتبة الثانية من تويتر، وقد دشن النشطاء الهاشتاج كدعم لمحدودي الدخل، الذين يريدون شراء هدية للفتاة التي يحبونها، بأقل وأبسط التكاليف ثلاثة جنيهات، وكانت أفكار النشطاء تدور حول شراء وردة وآيس كريم أو شوكولاتة، في حين رجح آخرون أن يقوم الشاب بشحن باقة موبايل بمبلغ 2 جنيه و80 قرشا ليتحدث إليها، وطالب آخرون بأن يقوم بإعطاء الثلاثة جنيهات لمن يحبها في يدها.
دعم لمحدودي الدخل
قالت ردينة: "إزاي تفرحها بــ 3 جنيه.. هاشتاج من ابتكاري كدعم لمحدودي الدخل.. هاتلها تذكرة مترو وبنص جنيه لب سوري وقضوها من حلوان للمرج فسحة جواه.. في بنات بتحب حقها ناشف كرمشهم في إيدها وآدي دقني لو عبرتك تاني بعد كدة".
وأضاف حسن خنفس: "هات لها شوكولاتة جالكسى أو كونو وخلاص".
وعلقت ديدو: "كوباية شاي بنعناع على كوبري قصر النيل".
وقال حسن أبو على: "شوكولاتة ماندولين ومكالمة طويلة بالباقي.. ممكن ساندويتش شاورما هو بكام دلوقتى".
حطهم في إيديها
تابع ميمو الكابيتوني: "حطهم في إيديها وهى هتفرح نفسها إنت فاكر إنها مستنياك تفرحها يا أهبل.. هات لها غزل البنات بيحبوه أوى وابقى افتكرنى عشان بحبه".
وعلق محمود: "قلم فلوماستر واكتب لها عالحيطة اللي قدام بيتها جملة بينك وبينها ومحدش يفهمها غيركو".
وقال أحمد أيمن مهيب: "كيس شيبسي بالخل عائلي".
وعلق محمود: "هات لها بلالين كتير".
وقال محمد لوت على: "كفاية عليها عصير قصب بجنيه".
وأضافت منال بندق: "وجايين ع نفسكوا ليه..جنيه واحد كفاية".
وتابعت عبير عويس: "كوز درة مشوي".
وقالت آية: "هات لها وردة هتفرح أوي...البنات بتحب الحاجات التافهة دي".
هات لها كونو
وعلقت بنت مصرية: "هات لها واحد كونو أو كان بيبسى وانت خد شفطة".
وتابع إسلام على: "ركبها توك توك لآخر الشارع صدقني هتنبسط منك أوي.. إنت تديها الثلاثة جنيه وامشي من سكات عشان مش هتعرفك تاني بكلمك بالأمانة يعني".
وقالت شيماء الشامي: "بص إنت تجيب صورة ليها ودي طبعا ببلاش وتجيب علبة هدايا اللي بتلاتة جنيه دي وتحطها فيها.. وتقولها ملقتشي أغلى من صورتك".
وأضاف محمد عزازي: "كوزين ذرة ع الكورنيش وشوية رومانسيات وهتطير من الفرح".
وتابعت هالة الشافعي: "بجنيه فشار وبجنيه ترمس وبجنيه غزل البنات.. وانت كده تبقى برنس".
اعمل باقة
وعلق عيد الماجيك: "جاي على نفسك ليه تلاتة جنيه في الزمن الأخبر ده.. هيعملوا إيه.. أنا مش أنا أنا واحد تاني غير اللي عرفته زمان".
وقالت إنجي العالم: "ما عنها ما فرحت هي ملهاش أهل يصرفوا عليها خليهملك يا ابنى".
وأضافت دوللي دودو: "هاتلها لبان وبالونتين... تفرقعهم من غلبها".
وعلقت أمنية محمد: "اعمل باقة من أم 2 جنيه و80 قرشا وكل شوية اطمن عليها ووريها إن فيه حد بيهتم بيها وسمعها كلام من قلبك بجد".
