«شيزوفرينيا» شعر أشرف الشافعى
كل حـــاجة فيكى ممكن
كل شىء جـــواكى جايز
تفرحى ف عنيكى أسكن
تزعلــــى يفصلنا حـــاجز
مـرة تايهة ومرة راسية
مرة فـاكرة ومرة ناسية
فهمينى إزاى يا قـاسية
انهـزم وأنا أصلى فــايز
كل حاجة فيكى ممكن
كل شىء جواكى جايز
كــل حـــاجة فيكى واردة
عقـــل أو مسـة جنــــون
ليه دفاكى مشاعره باردة
واليقين مليـــــان ظنـــون
طب قوليلى إزاى أعاملك
أبكــــــــى ولا ابتسمــلك
انتصـــــر ولا انهــــــزملك
أبقـى قـــادر ولا عــــاجز
كل حاجة فيكى ممكن
كل شىء جواكى جايز
ثورتــك تشبه خضوعك
والشتـا بقى زى صيفك
ضحكتك تشبه دموعك
وردتك كمـا حد سيفك
ممكنــك بقـى مستحيـلك
رجعتـــك تايهـة ف رحيـلك
قلت أمـوت وتشـدى حيلك
سبتى جرح ف قلبى غارز
كل حاجة فيكى ممكن
كل شىء جواكى جايز
