"الموج علينا حق".. شعر محمد حسنى إبراهيم
الموج علينا حق
ـــــــــــــــــــــــــــــ
مزج أول
كان نفسى أسيب الوجع وأغنى للأفراح
مسكين يا قلب الجدع ولا شاف مسا وصباح
ساب الدموع كلها ولم أفراحــــــــه
بعترها بين السطور وحس بجراحه
باتت عيون الصبية ع ليلها وصباحـه
نامت عيون الولا تشتهى التُفاح
كان نفسى أسيب الوجع وأغنى للأفراح
مزج تانى
هتقول وانت مسافر لأى بنى آدم يقابلك إنك ماشى مضطر
وإن دموعك دى عشان صعبان عليك السفر
أو إنك بتعمل مشهد رومانسى وكأنه مأثر فيك
المهم تلاقى مبرر لعيونك اللى كل ماتفتكر تكُر شلالات الدموع
والأهم إنك تبين قوتك حتى فى أضعف لحظة فيها
وماتنطقش كلمة وداع
ولا تفكر ف أى مشهد كانت معاك هنا أو هناك
مزج تالت
يابحر يابو الموج ـــــــــــ الموج علينا حق
غرقان ف ملح الوجع ولاعمرى فُت الحق
أبكى ف وسطك غريق ولا تنجينى
ولا دموع الفرح هربانة من عينى
ولا تسيب لى الفؤاد مفتوح لنور الحق
مزج رابع
بينى وبينك كل شىء موجوع
وحروف بتسقط وطابت ع الشجر م الجوع
ودموع تزهر بروحنا والوجع الوان
إزاى أقول للزمان ارجع ماعدش رجوع
مزج أخير
لو لسه مالك روحك اتكلم وقول
سبحانه من سخر بحوره ف العيون بتجول
يفرد نهاره وشمسه صباحة
على كل نسمة محبة تهل مرتاحة
وترق بيها القلوب مهما وجعنا يطول
