"ما بينا كان خط الثبات" قصيدة لمحمد حميدة
دمعك وطن
يشبه دموع الأنبيا
وقت الرحيل
يشبه عيال الثورة وقت المعركة
واقفين صفوف
نايمين على تراب الوطن
كالدمع فوق خد اليتيم
واليتم ف رحاب الميدان
أصعب كتير
قلبي الصغير
مش قد دقات الوجع
مش حمل لومك وأنتي نايمة في العرا
وكلاب سكك
تتملى من لحمك ساعات
يا مين يحن بكان بدن
ويلم م الأرض الشتات
يا مين يقول إن الغلابة فيك بشر
وإن الوطن
ممكن يساع الطيبين
وإن المسيح
مصلوب عشان المسلمين
يا مين يا يطبطب ع البدن
قبل الممات
يا مين يغنيكي ف سكات
زي الملايكة السهرانين وسط الميدان
كان
كان ياما كان
كنا هنا
كانوا هناك
فقلوبنا حلم
وهما ف إديهم حاجات
وما بينا فاصل دمعتك
ما بينا كان خط الثبات
لما انكسر
الحلم مات
لما انكسر
الحلم مات
