"لو كنت ولد" دعوة للفتيات لكتابة رغباتهن المكبوتة على صفحات "فيس بوك".. البنات: كنا هنخرج براحتنا ونركب دراجات ولا نتعرض للتحرش.. كنت هجيب لخطيبتي ورد وشيكولاتة.. والرجال: "كنتوا هتدخلوا الجيش"
أصبحت صفحات الموقع الاجتماعي "فيس بوك" مكانا للتنفيس عن كل الرغبات المكبوتة، وقد دشنت عدد من الناشطات حدث "إيفينت" بعنوان "لو كنت ولد".
وكتب أصحاب الدعوة في مقدمة الحدث " كل بنت بيبقى نفسها تعمل حاجات كتير بس طبعا بنلاقى الرد بيكون "لا عيب" "ليه" "لأنك بنت"، طيب بقولك إيه متخيلتيش إنك تبقى ولد، أيوه ولـــــــد ولو لساعة واحدة طيب متيجى نتخيل سوا وقوليلى لو كنتِ ولد عايزة تعملى إيه ؟
وتنوعت الرغبات المكبوتة لدى الفتيات، ودار أغلبها حول حرية الخروج من المنزل في أي توقيت، وكذلك حرية الحركة دون الخوف من التحرش، وإمكانية السفر للعمل والدراسة دون قيود من الأهل.
في المقابل أكدت فتيات أخريات أن كون الشخص ولدًا ليس شيئا جيدا، حيث اعتبرت العديد من المشاركات في الدعوة أن الرجال هم سبب الحروب والمجاعات، وقالت إحداهن "لا يشرفني أن أكون كائنا لا إنسانيا"
وكتبت إحدى المشاركات شكوى من تفريق والدتها بينها وبين شقيقها: "كنت هتخلص من مقولة ماما المشهورة الولد لو اتحط في النار هيطلع سليم إنما البنت لا"
فيما كتبت أخرى في الإشارة للرجال عن أوجه تقصيرهم في حق الفتيات قائلة: "لو كنت ولد كنت هاخد أختي أخرجها على الأقل كل أسبوع مرة، كنت هركب عجل براحتي، كنت وقت ما تطق ف دماغي أروح مثلا إسكندرية أفطر وأرجع مكنتش هتردد لحظة، لو كنت ولد برده كنت هجيب لخطيبتي كل يوم ورد وشيكولاتة هعمل كل حاجة بتحبها ومش هزعلها، وأهم حاجة كنت هروح أعمل عمرة ومش لازم محرم"
القوة مطلوبة
فيما كتبت أخرى " كنت هقول للي بحبه إني بحبه.. ساعتها مش هيتقال عليا كلمة.. وكأن الحب والاعتراف به حصري للولاد !! البنت يا تقول آه يا لأ.. بس حرام تحب وحرام تقول ده "
فيما كتبت أخرى " كنت هحمي أي بنت من المتحرشين، وهحمي أي ضعيف، القوة أحيانا مطلوبة"
كنتِ هتدخلي الجيش
ولم يلتزم الشباب الصمت ليردوا على الفتيات في الدعوة، حيث كتب أحدهم "لو كنت ولد كنت هتدخلي الجيش أعتقد إن ده سبب كافي لتغيير اسم الإيفينت"
فيما كتب آخر "لو كنت ولد يبقي هتقومي تخرجي بالليل عشان أختك مينفعش تخرج في وقت متأخر كده، ولو خرجت لازم تخرج معاها عشان مينفعش تخرج لوحدها، لو عندكوا شغل ف البيت يبقي هيطلع عينك ف الشغل عشان البنت مينفعش تشتغل والبيت فيه رجالة، لو ف مشكلة ف البيت انت اللي لازم تكون واقف مع أبوك عشان انت الراجل، لو في مناسبة مثلا وأبوك مش هيحضر لازم تلغي كل التزاماتك ف اليوم ده وتحضر انت عشان خاطر أبوك، إنتِ عاوزة تكوني ولد عشان تخرجي ف الشارع بالليل براحتك ومتعرفيش أن أخوكِ بيخرج عشان خاطرك إنتي وهي دي كل مشكلتك إنك عاوزة تخرجي براحتك"
