"صديقي الحزن".. قصيدة للشاعر عمرو حسن

صديقي- الحزن
بعد التحية والسلام
شكرًا جزيلًا ع الأصول والجدعنة
على انك صبرت معايا أكتر من سنة
كانوا الجميع بيناموا واحنا سهرانين
وعملت مني بصنعتك كائن حزين
لا سألتني عن سني كام
ولا قولتلي بتحب ايه
دخلت ورميت السلام
وصاحبتني ماعرفش ليه
وعشان كده انا باشكُرك
وبابلغك.. اني بعتت لضحكتي (طلب صداقة)
ونويت أكمِّل ف العلاقة
وإن إحنا جايز برضه نتقابل قريب
وأنا عارف انك حد طيب
بس لو ممكن غلاسة من صديقك
لو مشيت مرة ف طريقك
شُفتني موجوع باعاني
سيبني احل مشاكلي أحسن
وأنت صاحب حد تاني