تجليات "الهطــــل" الإعلامي!

عدت إلى منزلي بعد يوم عمل طويل مليء بالأحداث الملتهبة، وعلى رأسها تداعيات اقتحام الشرطة لمعاقل الإرهاب في "كرداسة" و"ناهيا"، واستشهاد اللواء نبيل فراج، مساعد مدير أمن الجيزة للوحدات.. وما أن اقتربت من الباب حتى سمعت صوت "المفعوص أبو نص لسان يصرخ قائلا: "إيه الهطل ده"..

فتحت الباب بسرعة خشية أن يكون فقد تربيته في لحظة غضب، ويوجه مثل هذا الكلام لوالدته، أو لإخوته البنات.. وما أن دخلت الشقة حتى فوجئت به جالسا بصحبة أمه يشاهدان أحد برامج "توك شو" بالتليفزيون والتي تغطى الحد، وتجري اتصالات هاتفية بالمسئولين وذوي الشأن.. فسألته:-

- إنت إللي كنت بتصرخ دلوقتي وتقول "إيه الهطل ده"؟!
- أيوه.. ما هي حاجة تغيظ..
- هي إيه إللي تغيظ؟
- إللي بيقولوه المذيعين في التليفزيون.. وعلى رأي الفنانة شويكار "شيء لا يثدكه عكل"..!
- ما تخلص وتقول فيه إيه..
- المذيع عمل مداخلة مع "عمر" وبيثأله عن "شعوره" بعد استشهاد والده اللوا.. وإزاي اثتقبل خبر وفاته..
- عمر مين؟!
- ابن اللوا نبيل فراج، مثاعد مدير أمن الجيزة، إللى مات في عملية اقتحام كرداثة.. تخيل أبوك مات وأنا بثألك شعورك إيه؟!.. ثيادتك هتكون فرحان ومزأطط.. ولا حضرتك هتعلق نور وزينة عشان "هَتِوْرِثْ" مثلا.. ولا هتتفشخر قدام زمايلك وتقول لهم هيه أبويا مات.. وبقيت يتيم..؟!
- المذيع بيسأله كده عشان أبوه مات شهيد.. يعني المفروض أهله يفرحوا.. مش كده ولا إيه؟!
- يا ثلام يا ثلام.. يا بويا.. الموت هو الموت.. والفراق هو الفراق.. وبعدين "الشهادة" دي في علم "الغيب".. وربنا يجعلنا من أهلها.. قول آمين..
- آمين..