الحيلة «الجهنمية» للقبض على كل «الإخوانجية»..!

كنت- كعادتي وبحكم عملي الصحفي- أتابع عمليات القبض على قيادات جماعة الإخوان "المسلمين" جدا جدا.. والمتورطين في جرائم قتل وتعذيب وتحريض على العنف قبل ثورة "30 يونيو" وبعد عزل الرئيس محمد مرسي.. وبينما أنا على هذا الحال أمام التليفزيون..  فوجئت بـ"المفعوص" أبو نص لسان يقول:-
- هما هينقطونا كل يوم بالقبض على واحد منهم.. ما يخلثونا بقى.. ويقبضوا عليهم مرة واحدة..
- صعب جدا..
- وإيه الثعوبة في كده؟!
- أولا المطلوب القبض عليهم وهم عددهم كتير.. ثانيا مش كلهم في مكان واحد.. ثالثا فيه ناس منهم "متخفيين" وبيحاولوا يهربوا بره مصر..
- كل دي حجج فارغة.. وملهاش أي لازمة.. وأنا لو من الداخلية والجيش كنت عملت زي ما عمل "بن على" فيهم..
- تقصد الرئيس التونسي الهارب زين العابدين بن على؟!
- طبعا..
- ودا عمل فيهم إيه.. فكرني كده؟!
- جه في فتره وقال لهم الانتخابات هتبقى حرة ونزيهة وشفافة وديمقراطية.. وخلّا كل "الفيران" تطلع من جحورها.. ومفيش كام يوم وراح قابض على كل "الإثلاميين" وعلى كل اللي انتخبوهم.. وخلّث الليلة !
- تقصد إننا نعملهم انتخابات دلوقتي عشان نلمهم ونقبض عليهم..؟!
- مش بالظبط كده..
- أومال إيه
- الحكومة تضحك على الإخوان وتعلن إنها هتعرض فيلم ضخم عن "حثن البنا" بكل دور العرض في حفلة تثعة لتناشر.. وهوب وهما جوّا الثينيمات تييجي الشرطة تقبض عليهم من غير لا إحم ولا دثتور..!
- يا فرحة أمك بيك..!