الطلبة «المخبرين».. و«الضبطية القضائية"!

على غير العادة.. استيقظت بعد الساعة السابعة صباحا.. فنهضت مسرعا إلى "الحمام" وأخذت "دوش" سريع.. وارتديت ملابسي على عَجَلْ للحاق بموعد العمل.. وما أن هممت بالخروج من الشقة إلا وسمعت صوت "المفعوص" أبو نص لسان يأتيني من داخل حجرة نومه قائلا:
- بابا.. حضرتك رايح الشغل..
- أومال رايح الملاهي.. خير فيه إيه؟!
- عاوز أتكلم معاك شوية..
- أنا مستعجل.. أما أرجع من الشغل..
- دي حاجة مثتعجلة وما ينفعش تتأجل..
- كفا الله الشر.. خير..
- خير إن شاء الله.. أنا عاوز أقدم في "الشرطة"..!
- والنبي!!.. إنت رايق وفايق ع الصبح.. حاضر يا سيدي أما تكبر هنقدم لك في الشرطة.. والحربية كمان لو حبيت.. سلام بقى..
- شرطة إيه.. وحربية إيه؟!.. أن عاوز أقدم في الشرطة المدرثية..
- هههههههههه... ليه بقى إن شاء الله.. ما سيادتك كنت بتكره الشرطة واللي بتعمله في الناس.. ويا ترى إيه إللي خلاك أوام تغير رأيك كده؟!
- عاوز أشارك في "الضبطية القضائية"..!
- الضبطية القضائية؟!.. ودي عرفتها منين..؟!
- م اللي بيتكلموا في التليفزيون..
- أيوه بس دي خاصة بالجامعات..
- عادي.. إحنا نبقى أحثن م الحكومة ونطبقه في المدارث كمان.. وشوف بقى.. ابنك لما يبقى في الشرطة المدرثية هيعمل إيه؟!
- هتعمل إيه يعني؟!
- أي واحد مش عاجبني هبلغ عنه فورا.. وأكتب فيه تقارير زي الزفت.. وهخليه يكره فيه اليوم إللي دخل المدرثة... دا غير شلة الطلبة "المخبرين" إللى هيشتغلوا تحت إيدي وينفذوا أوامري..
- بس دا يبقى اسمه "تعسف في استعمال السلطة"..!
- هههههههههههههه.... "ثلطة"..! وهو إحنا لو عندنا "ثلطة" بجد كانت عملت فينا كده؟!
- أنا اتأخرت ولازم أمشي..!