العامل "الغلبان" والمحافظ "الفتوة"!

بعد يوم عمل طويل وشاق.. عدت إلى شقتى بعد صلاة العشاء بثلاث ساعات على الأقل.. وبمجرد دخولي استقبلني المفعوص أبو نص لسان بموجة بكاء حارة قائلا:
- لحد إمتى هيفضل الناث الغلابة متهانين ومتبهدلين قبل الثورة وبعد الثورة..
- خير بس فيه إيه؟!
- وهييجي منين الخير وإحنا عندنا مثئولين "فتوات" و"بلطجية"؟!
- تقصد مين بالظبط؟!
- محافظ البحيرة اللواء مثطفى هدهود..
- وده عمل إيه؟
- ضرب واحد اثمه "عبد ربه عاشور".. عشان غلبان وملوش ضهر يثتند عليه..
- وعاشور ده شغال إيه؟!
- عامل نظافة بمجلث مدينة دمنهور..
- بس لحد علمي إن المحافظ اعتذر له.. وباس رأسه وقال له "حقك عليا".. وكمان اتصور معاه..
- يا ثلام.. كده بمنتهى البثاطة؟!.. إنت عارف لو ده كان حثل في دولة محترمة كان زمان المحافظ ده اتبهدل.. وأقله كان يتشال فيها..
- يا أخي.. بقولك الراجل اعتذر له وباس رأسه.. يعمل إيه تاني..
- ما يعملشي حاجة.. المفروض إحنا إللي نعمل..
- تعمل إيه؟!
- ثورة تالتة..
- هي البلد ناقصة ثورات..
- أكيد.. طالما مفيش حاجة اتغيرت.. وكل واحد مشغول بنفثه.. حضرتك عارف لو كان المحافظ ده أيام "مبارك" كان "الإخوان" فضحوا الدنيا.. وشوفوا المحافظين بتوع مبارك بيعملوا إيه في الشعب.. وبتوع حقوق الإنثان يطلعوا في التليفزيون وهات يا رغي وشعارات ملهاش أول من آخر..
- صحيح..
- ولو كان المحافظ ده أيام "مرثي" كانت "المعارضة" فضحت الدنيا.. وشوفوا المحافظين بتوع "الإخوان" بيعملوا إيه في الشعب.. وبتوع حقوق الإنثان يطلعوا برضه في نفث التليفزيونات وهات يا رغي وشعارات ملهاش أول من آخر.. والنتيجة إيه..!
- إيه؟!
- قمنا بثورتين.. في "25 يناير" و"30 يونيو".. والمثئولين هما هما.. والغلابة إللى بينضربوا ويتهانوا هما هما برضه.. يبقي لازم نقوم بثورة تالتة ولا لأ؟!
- تالتة ورابعة وخامسة كمان..!