أفضل طريقة لحصول الزمالك على "أي بطولة"!
كنت أتابع مباراة القمة الإفريقية بين الأهلي والزمالك في إطار الجولة الخامسة من المجموعة الأولى لدوري أبطال إفريقيا، والتي انتهت بفوز الأحمر على الأبيض بنتيجة 4- 2.. وبعد أن انتهت المباراة، بادرني المفعوص أبو نص لسان قائلا:
- هو إيه الموقف دلوقتي؟!
- كده يا حلو الأهلي ضمن التأهل لنصف النهائي، والزمالك- كالعادة-خرج صفر اليدين..
- والله دا ظلم.. حرام عليه الأهلي اللي بيعمله في الزمالك ده.. هو إيه ده.. كل مرة يكسر بخاطر اللعيبة و"مراتاتهم" وجمهورهم.. دا حتى الرحمة مطلوبة؟!
- يا حبيبي لكل مجتهد نصيب.. وعلى قد ما تتعب ربنا بيديك على قد تعبك..
- ونعم بالله.. بث المثألة "أفورت" قوى.. في الدوري بيتغلب.. في الكاث بيتغلب.. إفريقي بيتغلب.. يا ترى هو "منحوث" زي ما كان الرئيث المعزول.. ولّا حد عامله عمل على "وِرك" نملة مطلقة ولثه ما دخلتش دنيا...؟!
- الله يجازي شيطانك على تعبيراتك وتشبيهاتك.. لا نحس ولا دياوله.. كل الحكاية إن لعيبة الزمالك محتاجة تركز شوية في الملعب.. وشيكابالا يبطل يجر شكل الناس بره وجوّه الملعب..
- لا لا لا.. الزمالك جرب كل حاجة.. تركيز.. وثلاة قضاء الحاجة.. ودبح عجول.. وما فاضلش غير حاجة واحدة بث..
- إيه هي؟!
- لازم يكون فيه مادة في "الدثتور" الجديد تضمن حق الزمالك في الفوز على الأهلي مرة كل 5 ثنين على الأقل.. أو يكون الدوري والكاث مناثفة بين الاتنين.. يعني إللي ياخد الدوري يدي للتاني الكاث.. والعكث ثحيح..!
- ونفترض إن حد حب يغير المادة دي ويقول إشمعنى الزمالك..؟!
- لا ما إحنا هنقول إن مادة "فوز الزمالك" في "الدثتور" عاملة زي مواد "الهوية" المثرية.. بث بيني وبينك الواحد خايف من اعتراض حزب النور..!
