"الأسد" طالع بمنظرين في "البيت الأبيض"!

طبعا كلنا فاكرين "ماما أمريكا" لما كانت بتقول على الرئيس الأسبق حسني مبارك إنه "حد جميل" و"سو كيوت".. والديمقراطية مخلوقة علشانه.. وفجأة بعد ثورة 25 يناير طلع الراجل "شرير"و"سفاح" و"زير نساء".. وحاجات تانية وحشه كتير.. لو عاوز تعرفها "إبقى تعالى وأنا أقولهالك"!

نفس اللعبة "رجالة البيت الأبيض" كانوا لعبوها مع الرئيس العراقى "المعدوم" صدام حسين.. والرئيس التونسي "الهارب" زين العابدين بن على.. والرئيس الليبي "المقتول" معمر القذافي.. وغيرهم وغيرهم كتير.. وكل ده مسجل صوت وصورة..

أمريكا.. راعية الحرية والديمقراطية.. بتحاول اليومين دول تلعب نفس اللعبة مع الرئيس السوري بشار الأسد.. لما حست إنه خلاص بقى "كارت محروق".. وعشان الناس تعرف رجالة وحريم البيت الأبيض كانوا بيقولوا إيه على "بشار" من سنتين تلاتة.. بص يا سيدي..

وزير الخارجية الأمريكي الأخ "جون كيري"، في 2009 أيام ما كان رئيس لجنة العلاقات الخارجية بمجلس الشيوخ قال إن "إدارة الرئيس اوباما تعتبر "الأسد" لاعبا رئيسيا في جهود واشنطن الرامية لإحياء السلام في منطقة الشرق الأوسط".. شوف يا أخي.. مع إنهم بيقولوا على "بشار" دلوقتي إنه "سفاح" وزي "هتلر" بالظبط..!

أما وزيرة الخارجية الأمريكية السابقة الأخت هيلارى كلينتون فقالت في حوار مع برنامج "واجه الأمة" الشهير في مارس 2011، "هناك زعيم من نوع مختلف في سوريا الآن، والعديد من أعضاء الكونجرس من الحزبين الذين ذهبوا إلى سوريا في الشهور الماضية قالوا إنهم يعتقدون أنه إصلاحى".. ودلوقتي مش ناقص إنهم يرفعوا على "بشار" قضية "نفقة"..!

لا تخرج قبل أن تقول "سبحان الله".. وإن لم تقلها.. فاعلم أن أوباما هو الذي منعك..!