مساجد مطابقة للمواصفات القياسية!

ما إن دخلت منزلى حتى وجدت "المفعوص" أبو نص لسان يضرب كفا بكف.. ويبسمل ويحوقل ويحسبن على الحكومة، وعلى وزير الأوقاف بالتحديد.. فاقتربت منه "بحذر شديد" وسألته: 
- فيه إيه يا حبيبي.. متعفرت ليه.. ومالك ومال وزير الأوقاف؟!
- إنت متعرفش اللى عمله؟!
- عمل إيه إن شاء الله؟
- الوزير قرر منع ثلاة الجمعة في الزوايا والمساجد التي تقل عن 80 متر.. وهينقل كل الأئمة اللى في الزوايا إلى المثاجد الكبيرة بكل محافظة.. وقال إن الإمام الشافعي هو اللى أفتى بكده..
- دى حاجة كويسة جدا.. ويا ريت الوزارة متخليش أي حد يخطب الجمعة، ويا حبذا يكون من خريجي الأزهر..
- ما هي الأوقاف هتعمل كده.. بث أنا مش فاهم يعنى إيه هيمنعوا ثلاة الجمعة في المثاجد اللى هتقل عن 80 متر؟.. طب هما هيعرفوا إزاي؟.. هيقيثوا كل زاوية مثلا؟!
- ممكن وليه لأ؟!
- طيب.. وبالنثبة للمساجد والزوايا إللى مثاحتها 79 أو 79.5 متر.. الوزارة هتتعامل معاها إزاي؟!
- ممكن اللي قايمين على المسجد يقدموا طلب للوزارة عشان تعمل لهم استثنا.. أو يدفعوا مبلغ معين مقابل المتر أو النص متر اللى ناقص.. ومتحبكهاش قوى.. ومتبقاش حنبلى..!
- أنا اللى حنبلي برضو.. طيب وعلى كده المفروض إن كل مثجد أو زاوية تحت عمارة ينطبق عليها شرط الـ80 متر، يعلقوا يافطة كبيرة مكتوب عليها "هذا المثجد مطابق للمواثفات القياثية التي حددتها وزارة الأوقاف"..!
- مواصفات قياسية إيه؟.. شكلك هتبتدي تخرف.