منع "الفيزون" و"الشبشب" و"الشورت" في الجامعات!

ما أن عدت إلى منزلي حتى فاجأني المفعوص أبو نص لسان قائلا:
- هما صحيح هيمنعوا ارتداء "الفيزون" و"الشبشب" و"الشورت" في الجامعات؟!
- أيوه.. وأعتقد إن دى خطوة كويسة عشان نحافظ على الأخلاق ونعيد التربية إلى الجامعات.. ولّا انت عندك اعتراض؟
- أبدا أبدا.. معنديش اعتراض ولا حاجة.. بث المفروض كنا نبدأ بالأهم وبعدين المهم..
- تقصد إيه بالأهم والمهم..
- قثدي إننا كان لازم نبدأ بتطوير المناهج الأول.. محتاجين نطور العقول الأول.. محتاجين نمنع الأفكار الإرهابية الأول.. محتاجين نمنع اثتغلال الدكاترة للطلبة الأول.. وبعد كده الشكليات دي تييجي بعدين..!
- وجهة نظر برضو.. بس ما ننكرش إنها خطوة كويسة لإعادة الجامعات المصرية إلى مكانتها في التصنيف العالمي زي زمان..
- يا بابا التثنيف العالمي بييجي عشان مثتوى البحث العلمي في الجامعة، والمناهج إللي بيتم تدريثها للطلبة.. مش عشان "النقاب" و"الحجاب"..
- بس برضو "الحشمة" مطلوبة..
- ثحيح.. بث "الحشمة" لوحدها مش هي الثبب في ارتقاء الجامعات.. وزمان زي ما حضرتك بتقول كانت الجامعات نادرا ما بنلاقي فيها واحدة محجبة.. وغالبا كل الطالبات "ثافرات".. ولابثين "فوق الركبة".. و"كت" كمان.. ومع ذلك كانت جامعات مثر معترف بيها على مثتوى العالم.. وخرجت لنا عباقرة زى الدكتور طه حثين، ومثطفى مشرفة، وثميرة موثى.. وأنيث منثور والبرادعي وزويل..
- أنا معاك.. بس..
- لا بث ولا حاجة.. هو حضرتك مفكر إن منع "الفيزون" هيمنع "التحرش"؟!.. أبدا أبدا.. شباب الجامعات وتلامذة المدارث مش عاتقين أي واحدة.. حتى المنقبة بقت تتعاكث في الشارع..!
- أومال تفتكر نعمل إيه؟!
- نربيهم من أول وجديد..
- البنات والولاد؟!
- والمسئولين كمان!