"بنعرَّف نفسنا للوطن".. شعر صالح الغازي
نفس المنافسة
الأحصنة زي ما هيا
راكبينها اللي اتغيروا
نفس الحواجز
شوفت الحقيقة المجرمة
مين يشد؟
ومين يرخي؟
الناس..الناس
مالهمش حصان
وما يملكوش غير صوتهم
الفرح ما بيكملش
تهجم علينا ريح الليل
نتعفر
الروس السودة
جايلها قلب تسيِّل الدما والدمع
وزي ما هيا
دم الشهيد طازة
وديته وعد بنصب تذكاري
نصب
جاية ليالي نسف التراب
واللا احنا أول السكة؟
مين داخل السبق؟
الوطن ما فيهوش سباق
سيبوني أشوف أرضي
قدمي تلاقي مكانها
وطن على قدي
مين اللي عاجبه المُر؟
الحزن مش راجع للعيون تاني
مكملين
على قد ما الشمس مُشتاقة تعرفنا
مشتاقين نعرَّف نفسنا.
