ساخرون.. كابتن ماجد: إدينى رمضان وخُد منى مروان
تخيل يا مؤمن لو أن "رمضان صبحى" هو اللى بيلعب في ماتش "الأهلي وسيمبا التنزاني" كان ممكن يجرى إيه.. رمضان كان هيفضل يلف ويدور بالكورة مع نفسه لغاية ما ربنا يهديه ويباصيها أو يضيعها بعد أن يمل منها أو يكون غُلب حماره، وكانت المباراة ستنتهى بالكتير بفوز الأهلي 2/صفر!
وعلى العكس منه لعب "حسين الشحات" اللى الكورة ماكانتش بتقعد في رجله اكتر من عدة ثوانى.. غياب رمضان أظهر مواهب "الشحات" وقدراته.. وأطلق العنان لـ"على معلول" اللى أخد حريته في كل الانطلاقات اللى عملها وصنع منها معظم أهداف الفريق.. فيا ريت ماحدش يقول لى "إدينى رمضان" ولا حد يجيبلى سيرة "مروان".
وأنا مش عارف إيه السر اللى في "مروان محسن" بيجبر المدربين أنهم يصرون على إشراكه في كل المباريات.. أيوه يعنى بيعمل إيه مروان غير أنه بيحط هدف بعد إضاعة عشرين هدف تانيين.. أنا بزعل قوى لما بسمع إن الأهلاوية زعلانين من غياب مروان وبستغرب بجد.
عموما ربنا يشفيه ويرجع للملاعب بس يا ريت مش للمنتخب.. علشان بطولة أفريقيا هتبقى على أرضنا وعايزين نروح نشجع وننبسط مش نروح نشد في شعر راسنا مع كل هجمة بيضيعها مروان!
