ساخرون.. أبين زين وأقول على المستخبي لرئيس الوزراء

أبين زين.. وأقول على المستخبي واللي مش معروف.. وأضرب في ودعي.. وتمللي بادعي.. والمستخبي باقوله ع المكشوف
حضرة رئيس الوزارة كلنا شاهدين.. إن إنت عايز تحقق حاجة للملايين.. من عامة الشعب أو للسادة والعاملين.. وضروري طبعا تفكر في سداد الدين.. وتعديات بالشوارع تقفل الميادين.. والمشكلات كلها محتاجة حل رزين.. ورؤية للانفتاح بكافة القوانين..

لذا أقول نفسنا تغيير سريع ومتين.. وخطة فيها عمل لكافة العاطلين.. ولو سمحت إنت عارف إننا عايشين.. وسط الغلاء والسلع تحتاج جهود تموين.. غير الطرق والزراعة ومعركة تأمين.. لجميع حدود البلد من غدر مندسين.. والشرطة والجيش معاهم كل يوم في كمين.. وكلنا مدركين ما أنت فيه عارفين.. إن المشكلات كثيرة كأنها براكين.. فأرجو من حضرتك تخطيط وفيه تطمين.. لكل واحد وواحدة بأننا ماشيين.. نحو اقتصاد حر واعٍ يحقق المضامين.. ورفض أي انفلات من ساسة أو حاكمين.. وربنا يسترك لو تنصف المحالين.. إلى المعاش بعد خدمة من سنين وسنين.. وشعبنا في انتظار قرارات بها واثقين.. وكلنا نتحد ونقول لكم شاكرين.. وأرجو يوصل كلامي لكافة العاملين.