"إنت خيالى بجد يا ريس" للشاعر رمضان مسلم
(إنت خيالى بجد ياريس.. بس برافو)
قصيدة للشاعر... رمضان مسلم
أيوة برافو............................
معجب جدا بالتكتيك
معجب جدا بالتلكيك
معجب جدا بالتفريق
لجل تسود
بس نسيت إنه إحنا أسود
..........................................................................
شوف يا سيادة الريس
واسمع منى
أصلى فقير
وابن الثورة
اسمع منى
وأرجوك تفهم يمكن يمكن
نلحق مصر
شوف يا سيادة الريس
ركز بس
وانت بتقرا كتاب الله
وانت بتركع
وانت بتسجد
وانت بتدعى
وانت بتخطب وسط الناس
فى الجامع
أو فى الشعب إلى إنت اختارتو
يكون الشعب
إنى القاتل رايح النار
والمقتول رايح النار
المقتول يا سيادة الريس
مش بيفكر أصلا يقتل
كان بيحاول ياخد يدك
قبل الدنيا ما تاخدك
قبل السلطة ما تعمى عيونك
وإنت عجيب يا سيادة الريس
أيوة عجيب.....
قلبك جامد
عكس ملامحك
مش متراجع
يمكن ظالمك
فكرك أعلى
يعنى بمعنى
خلى الشعب يخف يا راجل
كدا هنوفر طاقة وشغل
نهضة بجد
..........................................................................................
عارف يوم ما نجحت ياريس
ضرب النار فى الشارع كان
زى الرز
والزغاريت
والتكبير والتهليل
واللى بيسجد
واللى يبوس فى تراب الأرض
واللى بيهتف
إصحى يا مصر
(جاء الحق وزهق الباطل)
(إن الباطل كان زهوقا)
كل طوائف الشعب يا ريس
واخد بالك
بس الآن
شيلى تراب الأرض يا مصر
هاتى المية
كلو بيهتف شيلنا الطين
........................................................
ممكن أسأل بس سؤال
ولا منعتوا هو كمان
أصلى قرارك أصبح نافذ
كل السلطة فى إيدك إنت
كلو بأمرك
بس اعذرنى هسأل بردو
هو إنت حقنت الدم العربى فى غزة إزاى
وامتى هتحقن دم بلادى
وليه أمريكا ما اعترضتش
وإيه السر إنها بتساندك
فى القرارات
كانت فين الشرطة
لما الشعب اللى إنت اختارتوا
منع القاضى ليدخل لجل ما يحكم
ظهرت بس لما الناس جايلك
دول شعبك ولا نسيت
...............................................
(أيوة برافو بجد ياريس)
بس................
وإنت بتقرا كتاب الله
وانت بتركع
وانت بتسجد
وانت بتخطب وسط الناس
فى الجامع
أو فى الشارع
وسط الشعب
اللى إنت اختارتوا
إنى القاتل جوة النار
والمقتول
لو عايز يقتل
جوة النار
والمتسبب
ولا هتنسى
زى ما نسيت الشعب التانى
المتسبب إيه الحكم بتاعو يا ريس
إسأل نفسك
ولا هتنسى
زى ما نسيت
كنت بتهتف ضد مبارك
كنت بتهتف ضد الخونة
كنت بتهتف ضد الظلم
وضد الجوع
وضد القتل ضد السلب وضد النهب
كنت بتهتف لجل الوحدة والقومية
والجبروت والطغيان والعميان
قولى يا ريس إيه الفرق
عارف إيه الفرق يا ريس
اسمع منى ركز بس
كنا زمان
كل الشعب بيهتف ضد الظلم
كل الناس بتساعد بعض
لجل ما توصل مصر
لجل ما تفتح باب للأمة
ولا كنا بنسأل حزبك إيه
ولا صفتك إيه
ولا إسمك إيه
كلو بيهتف
لجل ما توصل مصر
كلو بيمسح دم أخوه
وبيتبرع
وانت نسفت الفكرة
جوة الشعب اللى انت اختارتوا
صبح الشعب بيهتف ضد الشعب
تحيا الفرقة يا ريس لجل تسود
بس نسيت إنى إحنا أسود
.................................................
مش بتسلى
باعلن رأيى زى الناس
مصر حزينة
واللى إنتخبك شال الطين
قولى ضحكت علينا إزاى
عايز أتعلم
من جبروت المخ بتاعك
مش بتسلى
وبهتف ضدك
بهتف ضد الظلم
ضد القهر ضد الجوع
ضد الفرقة ضد عنادك
وضد رجوع العصر البائد
................................................
لمى تراب الأرض يا بلدى
وهاتى المية
كلو بيهتف شيلنا الطين
بس حذارى بجد يا ريس
الهزل اتحول لمناحة
والفرقة صبحت فواحة
مصر بتولع إصحى يا ريس
وتبقى خيالى بجد يا ريس
لو فكرت إنى الموضوع هيفوت عادى
وإنى الناس قلة وبتتسلى
إصحى ياريس
قبلك قالوا نفس كلامك
واحنا أسود يا سيادة الريس
مش خايفين ومش راجعين
فاكر الآخرة يا ريس ولا نسيت
إنت خيالى بجد ياريس
بس برافو
