الوصايا العشر.. لهذا العصر لبهاء قدرى

خليك يا بنى جنس يخاف ما يختشيش
واعرف صنوف الهلس علشان تعرف تعيش

حاور وداور وناور وابدأ بكلمة: بصراحة
وايّاك ف مرّة تتشاور، توصل لغرضك بالراحة

لو طلت يوم كرباج اتملك، استعبد
وإن جم خدوا الكرباج: للى ف إديه، واسجد

والصدق والعفة ارميها برّا الباب
وإن شفت يوم زفة خليك فيها الكداب

.....الظلم للمظلوم والحق للظالم
وإلا تبات محروم من رؤية العالَم؟!

..يا بنى دا كله يهون إلاها: قولة: لأ
مجنون وميت مجنون اللى يقول الحق

تسرق: حتبقى البوسّ ياخدوك على مارينا
تركب حمار سيدس وتعوم على طحينة


تعلى وتعلى وتعلى طول مانت عالى الصوت
وإن ذمتك واسعة حيوسّعولك: فوت

خلاصته، وباختصار: إياك تكون إنسان
خليك يا بنى حمار راكبينك الفرسان

واوعاك تخالفنى لو بالجزم ضربوك
آدى إنت شايفنى: عاجبك نهاية أبوك؟!