أمير طعيمة يطالب باستقالة هاني أبو ريدة بعد خسارة مصر في «كأس العالم»
عبر الشاعر أمير طعيمة عن حزنه بعد خسارة المنتخب المصري أمام المنتخب السعودي في كأس العالم بروسيا وطالب باستقالة هاني أبو ريدة رئيس الاتحاد.
وكتب طعيمة عبر صفحته الشخصية على موقع التواصل الاجتماعي فيس بوك «كان من العدل استمرار كوبر واتحاد الكرة والمشاركة في كأس العالم لأنهم وصلوا كأس العالم بعد غياب ٢٨ سنة وده إنجاز (بالنسبة لنا للأسف) وأمّم أفريقيا بعد غياب ٧ سنوات ووصولهم للنهائي بغض النظر عّن الأداء».
وأضاف «من العدل الآن استقالة أو إقالة الاتنين.. ليه ؟ عدم وصولنا لدور الـ ١٦ كان ممكن يكون أمر عادي بس في مجموعة غير دي، إحنا ما وقعناش زي المغرب مثلا مع البرتغال بطل أوروبا وإسبانيا بطل العالم».
-وتابع «القدر جابلك مجموعة ما تحلمش بيها، مفيش معاك فرقة من المستوى الأول لوضع روسيا على رأس المجموعة، والمنتخب اللي طلعلك من المستوي التاني منتخب قوي بس أهون من منتخبات كتير في نفس المستوى».
وأشار «بالورقة والقلم أنت بتسبق منتخبين في التصنيف الدولي ووصولك كأول المجموعة إنجاز نسبي ووصولك كثاني نتيجة طبيعية وكنّا هنحسبهالكم إنجاز لأننا ما عملنهاش قبل كده».
وأوضح «انك تخرج صفر ده فشل أكبر من إنجازك بالوصول، أنت ما عملتش اَي حاجة وتقريبا أسوأ أداء في الـ ٣٢ فرقة ومنهم كتير تسبقهم كتصنيف دولي».
وأضاف «ده مش أول صفر لهاني أبو ريدة فقد كان المسئول عن ملف تنظيم مصر لكأس العالم ٢٠١٠ وطلع بنفس النتيجة، المنظومة دي كلها لازم تتفور، ولازم مدرب وطني حافظ اللاعبين المحليين سواء حسام حسن أو حسن شحاتة يعيد بناء الفريق، وده مش صعب لأنك عندك لاعبين كتير عندهم خبرة دولية وسنهم صغير يعني مش هتتضطر في الإحلال والتجديد تعتمد على لاعب مش هتحتاجه بعد سنتين أو تلاتة».
