"لو انفجار بوسطن حصل فى مصر".. هالة: مش عاوزة كلام الطرف الثالث أو الفلول.. سلمى: اللى عملوا الانفجار 3 بالحارة المزنوقة.. القصاص:حمادة هلال حيغني "شهداء الماراثون ماتوا في الماراثون"

"لو انفجار بوسطن حصل فى مصر"، هاشتاج دشّنه النشطاء على "تويتر" عن انفجار بوسطن الذى حدث أمس فى أمريكا ومدى سرعة تحرك المسئولين الأمريكان لموقع الحادثة، مما دفع النشطاء للسخرية من تباطؤ المسئولين المصريين فى التعامل مع مثل هذه الأحداث.

"بلاك بلوك": لو انفجار بوسطن حصل فى مصر كان قالك الصيّع بتوع "بلاك بلوك" هم المسئولون عن الحادثة"!

وقالت هالة محمود: لو انفجار بوسطن حصل فى مصر مش عاوزة كلام الطرف التالت أو فلول المخلوع.

كريم ميخائيل قال: لو انفجار بوسطن حصل فى مصر كان هيطلع بيان من الحكومة بيقول إن دى حوادث عادية بتحصل فى كل البلاد.. وماكنتش هتلاقى ناس أمريكان بيقولوا (مات الكفار).

معتز الجمل قال: لو انفجار بوسطن حصل فى مصر حماس المنفذة وبتمويل قطرى إيرانى وبتخطيط ليبى سودانى.

ياسين القصاص قال: لو انفجار بوسطن حصل فى مصر كان حمادة هلال هيغنّى شهداء الماراثون ماتوا فى الماراثون.. وألتراس بوسطن يهتف: يا نجيب حقّهم يا نموت زيّهم.

وقال عمر صبرى: لو انفجار بوسطن حصل فى مصر‎‏ ‏كان ‏‏هيطلع مرسى‏ ‏و‏‏يقول ‏حقّهم ‏فى ‏رقبتى، ‏و‏هيقبض‏‏على ‏الفاعل ‏بس‏ ‏القضاء‏ هيطلعه ‏‏براءة‏ و‏يديلوا إخلاء ‏سبيل.

وقال حسام الدين: لو انفجار بوسطن حصل فى مصر.. إحنا لو عندنا بوسطن أصلًا ماكانتش مصر بقت عاملة كده!

ماجد سامح قال: لو انفجار بوسطن حصل فى مصر كان هيطلع شوبير ويقولك "لييييييييييييييييه لييييييييييييييييه، ها عشان شوية مجانين".

سلمى طه حسين قالت: لو انفجار بوسطن حصل فى مصر كان قالك اللى عملوا الانفجار دا 3 فى الحارة المزنزقة! أنا عارفهم كويس!

محمد صلاح قال: لو انفجار بوسطن حصل فى مصر هتستمر التبريرات وتبادل الاتهامات، وفى الآخر أهو المشرحة زادت كام قتيل زى العادى ولا حد بيسأل.

سمسمة 88، قالت: لو انفجار بوسطن حصل فى مصر.. كان عصام سلطان قال: وسيدى الحلِّى شوفت شفيق وهو بيدّى للواد 600 جنيه وعبوة ناسفة.

وقالت إنجى عبده: لو انفجار بوسطن حصل فى مصر كان بتاع الإعلام دوّر له على موزة من بتوع الماراثون.

وقال علاء فتحى: أعلنت جماعة الإخوان المسلمين أن الـ12 قتيلًا من أبناء الجماعة، لو انفجار بوسطن حصل فى مصر.

إيمى سامى قالت: لو انفجار بوسطن حصل فى مصر كنا هننزل جرى نملى البيت أكل وشرب، وماننزلش غير بعد أسبوع، والشرطة أصلًا هتفجّر نفسها عشان هتفشل تمسك اللى فجّر.

دينا شهاب قالت: لو انفجار بوسطن حصل فى مصر، وإيه اللى ودّاهم هناك.

وقال آخر: لو انفجار بوسطن حصل فى مصر كان الإخوان نزلوا ليؤيدوا الانفجار فى جمعة الماراثون والشريعة.

وقال محمد أنور: لو انفجار بوسطن حصل فى مصر كانت الرئاسة هتطلع بيان شجب واستهجان، لأن الضحايا لم يستوفوا الحد الأدنى من الطبيعى.

وقال يسرى أحمد: لو انفجار بوسطن حصل فى مصر، كان زمان الضحايا 50 والإصابات 200، والداخلية لا تفعل أى شىء.

وقالmyousef : لو انفجار بوسطن حصل فى مصر، إحنا بس نبقى زى بوسطن ويحصل اللى يحصل.

وقال بومبستيك: هتبقى جبهة الإنقاذ والبرادعى همَّ السبب.