بهلول المشغول: مافيش تانى سخرية

قالولى اسكت خالص
وكفاية زعيق وعويل
الظرف ماهوش ناقص
خليك ظريف وجميل
بلاش تنقُد فلان
ولا تسخر من عِلان
قُل لنا كام نكتة
وضّحكنا زى زمان
أنا قلت طب ومالو
آدى نكتة آخر مزاج
عيان المرض جالوا
ملقاش تّمّن العلاج
وخُد منى نكتة تانية
نضحك عليها سوا
صيدلانية قالت للتانية
مافيش عندى دوا
وآدى نكتة تالتة كمان
عن صاحب شركة دوا
ووزير صحة تعبان
اتخانقوا الاتنين سوا
الأول أخد قرار
برفع سعر الدوا
التانى عايز دولار
وبرضو اتخانقوا سوا
ومريض غلبان محتار
عنده المرض اللعين
مستنى آخر الحوار
وبيقول علاجى فين
يارب تكونوا ضحكتوا
وقضيتوا ساعة هنية
النقد خلاص أنا سبتو
ومافيش تانى سخرية